ក្រុមបាតុកររាប់ម៉ឺននាក់ នាំគ្នាដង្ហែក្បួនតវ៉ានៅក្នុងទីក្រុងតែល អាវីវ ប្រទេសអ៊ីស្រាអែល កាលពីថ្ងៃសៅរ៍ ក្រោយពួកគេជួបជុំគ្នាតាមដងផ្លូវ ដើម្បីទាមទារឲ្យដោះលែងចំណាប់ថ្នូ និងតវ៉ាប្រឆាំងនឹងរដ្ឋាភិបាលរបស់លោកនាយករដ្ឋមន្រ្តី Benjamin Netanyahu ។ 

 បាតុកម្ម តែងតែធ្វើឡើងនៅលើទីលានចតុរង្គរបស់ទីក្រុងតែល អាវីវ ដើម្បីតវ៉ាប្រឆាំងរដ្ឋាភិបាលអ៊ីស្រាអែល និងទាមទារឲ្យមានការដោះលែងចំណាប់ថ្នូរនៅតំបន់ហ្កាហ្សាស្រ្ទីប ។ 

 បើទោះបីជាការស្ទង់ បង្ហាញពីការគាំទ្រយ៉ាងម៉ឺងម៉ាត់នៅក្នុងចំណោមសាធារណជនអ៊ីស្រាអែលឲ្យបន្តសង្រ្គាមប្រឆាំងក្រុមជីវពលហាម៉ាស់ក៏ដោយ ក៏បាតុកម្មបញ្ជាក់យ៉ាងច្បាស់ពីការបែងចែកគ្នានៅក្នុងសង្គមអ៊ីស្រាអែលដែរ ។ 

 ការស្លាប់របស់ទាហានអ៊ីស្រាអែល ៨នាក់ កាលពីថ្ងៃសៅរ៍ អាចធ្វើឲ្យស្ថានភាពនយោបាយកាន់តែស្មុគស្មាញ សម្រាប់លោក Netanyahu រយៈពេល ១សប្តាហ៍ ក្រោយអតីតឧត្តមសេនីយ៍និយមកណ្តាលលោក Benny Gantz បានលាលែងពីតំណែងនៅក្នុងរដ្ឋាភិបាល ដោយរូបលោកបានចោទប្រកាន់លោក Netanyahu ថាគ្មានយុទ្ធសាស្រ្តត្រឹមត្រូវនៅក្នុងសង្រ្គាមហ្កាហ្សា ។ 

 ថ្វីបើសំពាធអន្តរជាតិកើនឡើងឲ្យមានបទឈប់បាញ់ក៏ដោយ កិច្ចព្រមព្រៀងបញ្ឈប់សង្រ្គាម នៅតែមិនទាន់លេចចេញជារូបរាង រយៈពេលជាង ៨ខែ ចាប់តាំងពីការផ្ទុះសង្រ្គាមនៅតំបន់ហ្កាហ្សាកាលពីខែតុលា ឆ្នាំ ២០២៣ ក្នុងនោះការប៉ះទង្គិចគ្នាដោយអាវុធ នៅតែបន្តកើតមានស្ទើរាល់ថ្ងៃនៅតាមព្រំដែនភាគខាងត្បូងលីបង់ ជាមួយក្រុមជីវពលហេសប៊ូឡា ៕