ស្ថាប័នអង្គការសហប្រជាជាតិមួយបាននិយាយកាលពីថ្ងៃសៅរ៍ (១៥ មិថុនា) ថា កុមារប្រហែល ៦២៥.០០០ នាក់មិនទទួលបានការអប់រំនៅតំបន់ហ្កាហ្សាស្ទ្រីបនោះទេ ខណៈដែលសាលារៀនត្រូវបានបង្ខំឱ្យបិទទ្វារ ដោយសារតែជម្លោះដ៏បង្ហូរឈាមរវាងប៉ាឡេស្ទីន-អ៊ីស្រាអែល។

ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA) បាននិយាយនៅក្នុងសេចក្តីថ្លែងការណ៍មួយនៅលើបណ្ដាញសង្គម X ថាក្រុមការងាររបស់ខ្លួនបន្តគាំទ្រកុមារប៉ាឡេស្ទីនតាមរយៈសកម្មភាពដែលជួយពួកគេឱ្យត្រឡប់ទៅរៀនវិញ ប៉ុន្តែនេះមិនគ្រប់គ្រាន់ទេ ដោយសង្កត់ធ្ងន់លើភាពចាំបាច់នៃបទឈប់បាញ់បន្ទាន់មួយនៅពេលនេះ។

សង្រ្គាមបានធ្វើឱ្យក្មេងៗនៅតំបន់ហ្កាហ្សា បាត់បង់កុមារភាពរបស់ពួកគេ ហើយកុមារដែលនៅរស់រានមានជីវិតកំពុងមានរបួសផ្លូវចិត្តយ៉ាងធ្ងន់ធ្ងរ ដោយសារតែសាលារៀនរបស់ពួកគេត្រូវបានបំផ្លាញ ហើយពួកគេបានបាត់បង់ការសិក្សាពេញមួយឆ្នាំដោយពុំមានការអប់រំ និងមិនអាចលេងកម្សាន្តក្នុងកុមារភាពរបស់ពួកគេបាន។

សេចក្តីថ្លែងការណ៍បាននិយាយថា កុមារគឺជាមនុស្សដំបូងគេដែលទទួលរងការឈឺចាប់បំផុតនៅក្នុងជម្លោះ និងសង្រ្គាម ដោយចង្អុលបង្ហាញថាកុមារមួយចំនួនធំត្រូវបានសម្លាប់ និងផ្សេងទៀតបានរងរបួស ហើយកុមារជាច្រើននឹងមានស្លាកស្នាមផ្លូវចិត្តអស់មួយជីវិត។

ចាប់តាំងពីថ្ងៃទី០៧ ខែតុលាកន្លងមក អ៊ីស្រាអែល បាននិងកំពុងធ្វើសង្រ្គាមទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដែលនាំឱ្យមានការស្លាប់ និងបំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធ បន្ទាប់ពីក្រុមហាម៉ាស បានបើកការវាយប្រហារដ៏ភ្ញាក់ផ្អើលលើភាគខាងត្បូងអ៊ីស្រាអែល៕