សេដ្ឋវិទូចិនម្នាក់បាននិយាយកាលពីថ្ងៃសៅរ៍ (១៥ មិថុនា) ថា ការប៉ុនប៉ងដ៏អនុត្តរភាពរបស់សហរដ្ឋអាមេរិក ដើម្បីរារាំងកំណើនសេដ្ឋកិច្ចរបស់ប្រទេសចិន ដោយការរឹតបន្តឹងលើការចូលប្រើប្រាស់បន្ទះឈីប អេអាយ (AI) កម្រិតខ្ពស់ មិនទទួលបានជោគជ័យឡើយ។

រដ្ឋបាលលោកប្រធានាធិបតីអាមេរិក ចូ បៃដិន (Joe Biden) ត្រូវបានគេរាយការណ៍ថាកំពុងពិចារណាលើការរឹតបន្តឹងបន្ថែមទៀតលើការចូលប្រើរបស់ប្រទេសចិនចំពោះបច្ចេកវិទ្យាបន្ទះឈីបដែលប្រើសម្រាប់បញ្ញាសិប្បនិម្មិត។ ការរឹតបន្តឹងនេះមានគោលបំណងធ្វើឱ្យវាកាន់តែពិបាកសម្រាប់ប្រទេសចិន ក្នុងការប្រើប្រាស់ស្ថាបត្យកម្មបន្ទះឈីបទំនើបបំផុត ដែលគេស្គាល់ថាជា បន្ទះឈីបមុខបួនជ្រុង (gate all-around ឬ GAA)។

លោក ឡរិន លីវ (Lawrence Lau) សាស្ត្រាចារ្យផ្នែកសេដ្ឋកិច្ចនៅសកលវិទ្យាល័យចិនហុងកុង បាននិយាយថា សហរដ្ឋអាមេរិកកំពុងធ្វើដូច្នេះដើម្បីរារាំងការអភិវឌ្ឍន៍របស់ប្រទេសផ្សេងទៀត ខណៈពេលដែលរក្សាបាននូវអនុត្តរភាពវិទ្យាសាស្ត្រ និងបច្ចេកវិទ្យារបស់ខ្លួន។ ប៉ុន្តែទោះបីជាមានការដាក់ទណ្ឌកម្មកាន់តែខ្លាំងក៏ដោយ ក្រុមហ៊ុនបច្ចេកវិទ្យាយក្សរបស់ចិន ហ័រវ៉ី (Huawei) បានបង្ហាញនូវរបកគំហើញបច្ចេកវិទ្យាដ៏គួរឱ្យកត់សម្គាល់កាលពីឆ្នាំមុន ជាមួយនឹងការចេញលក់ស្មាតហ្វូន ម៉េត ៦០ ប្រូ (Mate 60 Pro) របស់ខ្លួនបានធ្វើឱ្យមានការភ្ញាក់ផ្អើលដល់វិស័យឧស្សាហកម្ម និងអ្នកបង្កើតគោលនយោបាយរបស់សហរដ្ឋអាមេរិក។

លោកជឿជាក់ថា ទីបំផុតសហរដ្ឋអាមេរិកនឹងដឹងថា ការរឹតបន្តឹងរបស់ពួកគេលើការនាំចេញឧបករណ៍អេឡិចត្រូនិកកម្រិតខ្ពស់ទៅកាន់ប្រទេសចិន នឹងមិនរារាំងការរីកចម្រើនផ្នែកបច្ចេកវិទ្យារបស់ប្រទេសចិនឡើយ ហើយជំនួសមកវិញ ឧស្សាហកម្មរបស់អាមេរិក ទេនឹងជាអ្នកទទួលរងផលប៉ះពាល់ធ្ងន់ធ្ងរពីកំហុសឆ្គងរបស់ខ្លួន៕