មេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) បាននិយាយនៅថ្ងៃអាទិត្យ (១៦ មិថុនា) នេះថា ប្រទេសចិន ចាត់ទុកការដាក់បញ្ចូល និង «ការលុបបំបាត់» កោះតៃវ៉ាន់ថាជាបុព្វហេតុជាតិដ៏អស្ចារ្យរបស់ខ្លួន ដោយប្រាប់ដល់កម្មាភិបាលនៅសាលាបឋមសិក្សាយោធាថា ពួកគេត្រូវតែស្គាល់ឱ្យច្បាស់ពីសត្រូវរបស់ខ្លួន ហើយកុំចុះចាញ់នឹងភាពរបរាជ័យឱ្យសោះ។

លោក ឡៃ បានប្រឈមមុខនឹងវោហារសាស្រ្តវាយប្រហារម្ដងហើយម្ដងទៀតពីចិន ដែលចាត់ទុកកោះតៃវ៉ាន់ជាទឹកដីរបស់ខ្លួន ចាប់តាំងពីចូលកាន់តំណែងកាលពីខែមុនមក ដោយទីក្រុងប៉េកាំង បានហៅលោកថាជា «ជនផ្ដាច់ខ្លួនដ៏គ្រោះថ្នាក់»។ ប្រទេសចិនបានរៀបចំហ្គេមសង្គ្រាមជុំវិញកោះតៃវ៉ាន់ ភ្លាមៗបន្ទាប់ពីការឡើងកាន់តំណែងរបស់មេដឹកនាំតៃវ៉ាន់ថ្មីរូបនេះ។

លោក ឡៃ និយាយថា មានតែប្រជាជនតៃវ៉ាន់ទេដែលអាចសម្រេចអនាគតរបស់ពួកគេបាន ហើយបានផ្តល់ការចរចាម្តងហើយម្តងទៀតជាមួយទីក្រុងប៉េកាំង ប៉ុន្តែត្រូវបានបដិសេធ។ លោកបាននិយាយថា «បញ្ហាដ៏ធំបំផុតគឺត្រូវប្រឈមមុខនឹងកំណើនដ៏ខ្លាំងក្លារបស់ប្រទេសចិន ហើយចាត់ទុកការដាក់បញ្ចូលរបស់តៃវ៉ាន់ និងការលុបបំបាត់កោះនេះជាបុព្វហេតុនៃការស្តារឡើងវិញដ៏អស្ចារ្យនៃប្រជាជនរបស់ខ្លួន»។

ការិយាល័យកិច្ចការតៃវ៉ាន់របស់ប្រទេសចិន មិនបានឆ្លើយតបការហៅទូរស័ព្ទនៅថ្ងៃអាទិត្យនេះដើម្បីស្វែងរកការអត្ថាធិប្បាយអំពីសុន្ទរកថារបស់លោក ឡៃ នោះទេ។ លោក វ៉ាង ហ៊ូនីង (Wang Huning) ដែលជាមេដឹកនាំលំដាប់ទីបួននៅក្នុងបក្សកុម្មុយនិស្តកំពុងកាន់អំណាចរបស់ប្រទេសចិន បានប្រាប់វេទិកាមួយកាលពីថ្ងៃសៅរ៍ នៅក្នុងប្រទេសចិនអំពីទំនាក់ទំនងជាមួយកោះតៃវ៉ាន់ ថា «ការបង្រួបបង្រួមជាតិគឺជាភាពចាំបាច់ជាប្រវត្តិសាស្ត្រសម្រាប់ការស្តារឡើងវិញដ៏អស្ចារ្យនៃប្រជាជាតិចិន» ដោយប្តេជ្ញាថានឹង «បំផ្លាញគ្រប់ផែនការផ្ដាច់ខ្លួនទាំងអស់»៕