​អាហ្វហ្គានីស្ថាន៖ អ្នកក្រុង​កា​ប៊ុល​រាប់​រយ​នាក់​បាន​ប្រញាប់ប្រញាល់​ទៅ​ធនាគារ New Kabul Bank ដើម្បី​ដក​ប្រាក់​ពី​គណនី​របស់​ពួកគេ ខណៈ​ដែល​ក្រុម​យុទ្ធ​ជនតា​លី​បង់​បាន​ចូល​រដ្ឋធានី​កាលពី​ថ្ងៃអាទិត្យ ​ទាមទារ​ឱ្យ​រដ្ឋាភិបាល​កណ្ដាល​ចុះចាញ់​ដោយ​គ្មាន​លក្ខខណ្ឌ​។

​ជនជាតិ​អា​ហ្វ​ហ្គា​នី​ស្ថាន និង​ជនបរទេស​បាន​ប្រជែង​គ្នា​ចាកចេញ​ ដែល​ជា​សញ្ញា​នៃ​ការ​បញ្ចប់​ការ​សាកល្បង​រយៈពេល ២០​ឆ្នាំ​របស់​បស្ចិមប្រទេស​ ដែល​មាន​គោលបំណង​ស្ដារ​ស្ថានការណ៍​នៅ​អា​ហ្វ​ហ្គា​នី​ស្ថាន​ឡើងវិញ​។ ​ជន​ស៊ីវិល​ភ័យខ្លាច​ថា ​ពួក​តា​លី​បង់​អាច​អនុវត្តន៍​ឡើងវិញ​នូវ​ប្រភេទ​នៃ​របប​ឃោរឃៅ​ដែល​លើក​លែង​តែ​ការ​លុប​បំបាត់​សិទ្ធិ​ស្ត្រី​ បាន​ប្រញាប់ប្រញាល់​ចាកចេញ​ពី​ប្រទេស​ដោយ​តម្រង់​ជួរ​នៅ​ម៉ាស៊ីន​ដក​លុយ ​ដើម្បី​ដក​ប្រាក់​សន្សំ​របស់​ពួកគេ​។ ខណៈ​ទៅ​បើកប្រាក់​ខែ​តាម​ម៉ាស៊ីន​ដក​ប្រាក់ លោក Bostan Shah អាយុ ២៤​ឆ្នាំ​ដែល​បម្រើការ​ជា​នគរបាល​នៅ​ទីក្រុង​កាន់​ដា​ហា​បាន​និយាយ​ថា រដ្ឋាភិបាល​មិនបាន​ដោះស្រាយ​បញ្ហា​របស់​យើង​ទេ​។

ចំណែក​មន្ត្រី​នគរបាល​សម្នាក់​ទៀត​ឈ្មោះ Abdul Mossawer អាយុ ៣២​ឆ្នាំ​បាន​ត្អូញត្អែរ​អំពី​ការ​រង់​ចាំ​នៅ​ខាងក្រៅ​ធនាគារ​ដោយ​និយាយ​ថា ​បុគ្គលិក​ធនាគារ​បាន​ចេញ​មក​ម្តង​ហើយ​ម្តង​ទៀត និង​ផ្តល់​ហេតុផល​ផ្សេងៗ​សម្រាប់​ការ​ពន្យារ​ពេល​នេះ​។ ​អ្នកដំណើរ​បាន​ធ្វើ​ដំណើ​រ​ទៅកាន់​អាកាសយានដ្ឋាន​អន្តរជាតិ Hamid Karzai របស់​ទីក្រុង​កា​ប៊ុល​កាលពី​ថ្ងៃ​សៅរ៍​ដើម្បី​ចាកចេញ​ពី​អា​ហ្វ​ហ្គា​នី​ស្ថាន​ ដោយ​ប្រឈម​នឹង​ការ​វាយ​សម្រុក​ទៅ​មុខ​របស់​ក្រុម​តា​លី​បង់​ ខណៈ​ដែល​រដ្ឋធានី​មួយ​នេះ​ហៀបនឹង​ធ្លាក់​ចូល​ក្នុង​ដៃ​ក្រុម​តា​លី​បង់​៕

អត្ថបទ៖ សុខមាន