ប្រទេសអ៊ីរ៉ង់ នៅថ្ងៃអាទិត្យ (១៦ មិថុនា) នេះបានរិះគន់សេចក្តីថ្លែងការណ៍របស់ក្រុមប្រទេសទាំងប្រាំពីរ (G7) និងអំពាវនាវដល់ក្រុមនេះឱ្យឃ្លាតចេញពី «គោលនយោបាយបំផ្លិចបំផ្លាញពីអតីតកាល» របស់ខ្លួន នេះបើតាមអ្នកនាំពាក្យក្រសួងការបរទេសអ៊ីរ៉ង់ លោក ណាសសើ ខាណានី (Nasser Kanaani) ដោយសំដៅលើសេចក្តីថ្លែងការណ៍របស់ក្រុមប្រទេសសេដ្ឋកិច្ចរីកលូតលាស់ទាំង៧ ឬ G7 ដែលថ្កោលទោសកំណើនសកម្មភាពនៃកម្មវិធីនុយក្លេអ៊ែរនាពេលថ្មីៗនេះរបស់អ៊ីរ៉ង់។

កាលពីថ្ងៃសុក្រ សប្ដាហ៍មុន ក្រុមប្រទេស G7 បានព្រមានអ៊ីរ៉ង់ ប្រឆាំងនឹងការជំរុញកម្មវិធីពង្រឹងនុយក្លេអ៊ែររបស់ខ្លួន ហើយបាននិយាយថា ពួកគេនឹងត្រៀមខ្លួនជាស្រេចក្នុងការអនុវត្តវិធានការថ្មី ប្រសិនបើទីក្រុងតេអេរ៉ង់ បញ្ជូនមីស៊ីលបាលិស្ទិកទៅឱ្យរុស្ស៊ី។

លោក ខាណានី បាននិយាយថា «រាល់ការប៉ុនប៉ងដើម្បីភ្ជាប់សង្រ្គាមនៅអ៊ុយក្រែន ទៅនឹងកិច្ចសហប្រតិបត្តិការទ្វេភាគីរវាងអ៊ីរ៉ង់ និងរុស្ស៊ី គឺជាទង្វើដ៏លំអៀងដែលមានគោលដៅនយោបាយតែប៉ុណ្ណោះ» ដោយបន្ថែមថា ប្រទេសមួយចំនួនកំពុង «ស្វែងរកការអះអាងមិនពិត ដើម្បីបន្តការដាក់ទណ្ឌកម្ម» ប្រឆាំងនឹងអ៊ីរ៉ង់។

កាលពីសប្តាហ៍មុន ក្រុមប្រឹក្សាភិបាលនៃប្រទេសចំនួន ៣៥ របស់អង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានអនុម័តសេចក្តីសម្រេចមួយដោយអំពាវនាវឱ្យប្រទេសអ៊ីរ៉ង់ បង្កើនកិច្ចសហប្រតិបត្តិការជាមួយអង្គការឃ្លាំមើល និងបញ្ឈប់ការរារាំងលើអ្នកត្រួតពិនិត្យនាពេលថ្មីៗនេះ។

យោងតាមរបាយការណ៍របស់ទីភ្នាក់ងារថាមពលអាតូមិកអន្តរជាតិ (IAEA) បានឱ្យដឹងថា ប្រទេសអ៊ីរ៉ង់បានឆ្លើយតបទៅនឹងសេចក្តីសម្រេចនោះដោយការដំឡើងឧបករណ៍បន្ថែមក្នុងការចម្រាញ់សារធាតុអ៊ុយរ៉ានីញ៉ូមបន្ថែមយ៉ាងឆាប់រហ័ស ហើយក៏បានចាប់ផ្តើមដំឡើងឧបករណ៍ផ្សេងៗបន្ថែមទៀត៕