ស្ត្រីរាប់ពាន់នាក់ បានចេញតវ៉ាកាលពីថ្ងៃសៅរ៍ (១៥ មិថុនា) ប្រឆាំងនឹងសេចក្ដីស្នើច្បាប់ដែលកំពុងដំណើរការនៅក្នុងសភាអភិរក្សនិយមរបស់ប្រទេសប្រេស៊ីល ដែលនឹងធ្វើឱ្យការរំលូតកូនបន្ទាប់ពីមានផ្ទៃពោះរយៈពេល ២២ សប្តាហ៍ដូចទៅនឹងអំពើមនុស្សឃាត និងបង្កើតការកាត់ទោសដាក់ពន្ធនាគារពី ៦ ឆ្នាំទៅ ២០ ឆ្នាំ។

ក្រុមបាតុករបានដើរដង្ហែរក្បួនតាមមហាវិថី ប៉ូលីស្តា (Paulista) របស់ទីក្រុង សៅប៉ូឡូ (Sao Paulo) ដោយមានកាន់បដាបដិសេធសំណើច្បាប់នោះ ដែលពួកគេហៅថាជាវិធីសាស្ត្រដ៏គាបសង្កត់បំផុតចំពោះសិទ្ធិបន្តពូជរបស់ស្ត្រីក្នុងរយៈពេលជាច្រើនទសវត្សរ៍។ មនុស្សម្នាគ្រប់វ័យ រួមទាំងអ្នកចូលនិវត្តន៍ និងកុមារជាច្រើននាក់បានចូលរួមនៅក្នុងការតវ៉ានោះ។

ការរំលូតកូនត្រូវបានអនុញ្ញាតនៅក្នុងប្រទេសប្រេស៊ីលតែក្នុងករណីនៃការរំលោភ គភ៌ (ទារក) ខូចទ្រង់ទ្រាយ ឬនៅពេលដែលជីវិតរបស់ម្តាយស្ថិតក្នុងគ្រោះថ្នាក់។ ប្រសិនបើសេចក្ដីស្នើច្បាប់ដែលគាំទ្រដោយសមាជិកសភានោះក្លាយជាច្បាប់ពេញលេញ ការរំលូតកូនដោយជនរងគ្រោះដោយការរំលោភនឹងត្រូវបានចាត់ទុកថាជាមនុស្សឃាត បន្ទាប់ពីមានផ្ទៃពោះរយៈពេល ២២ សប្តាហ៍។

ក្រុមស្ត្រីនិយម បានរិះគន់សំណើច្បាប់នោះថាជាការដាក់ទណ្ឌកម្មលើស្រ្តីធ្ងន់ធ្ងរជាងច្បាប់ដាក់ទោសលើអ្នកចាប់រំលោភនៅប្រេស៊ីល។ ពួកគេក៏អះអាងដែរថា វិធានការនេះនឹងប៉ះពាល់យ៉ាងខ្លាំងដល់កុមារដែលត្រូវបានរំលោភបំពានដោយសមាជិកគ្រួសារ។ កុមាររងគ្រោះបែបនេះជារឿយៗខ្វះការយល់ដឹង ឬការគាំទ្រ ក្នុងការទទួលស្គាល់ខ្លួនឯងថាជាជនរងគ្រោះនៃឧក្រិដ្ឋកម្ម ហើយតែងតែដឹងយឺតពេលអំពីការមានផ្ទៃពោះរបស់ខ្លួន៕