ក្រុមមន្ត្រីក្នុងតំបន់បាននិយាយកាលពីថ្ងៃសៅរ៍ (១៥ មិថុនា) ថា មនុស្សយ៉ាងហោចណាស់ ៧ នាក់ត្រូវបានសម្លាប់នៅក្នុងភាពចលាចលនៅក្នុងខេត្ត ណស គីវូ (North Kivu) ភាគខាងកើតនៃសាធារណរដ្ឋប្រជាធិបតេយ្យកុងហ្គោ បន្ទាប់ពីមនុស្សម្នាចេញតវ៉ាប្រឆាំងនឹងកំណើននៃការវាយប្រហារដ៏បង្ហូរឈាមដោយក្រុមបះបោរអ៊ីស្លាមនិយម។

កងកម្លាំងសម្ព័ន្ធមិត្តប្រជាធិបតេយ្យ (ADF) ដែលជាក្រុមឧទ្ទាមមានទំនាក់ទំនងជាមួយក្រុមរដ្ឋអ៊ីស្លាម (IS) ត្រូវគេចោទប្រកាន់ថាបានសម្លាប់មនុស្សជាង ៤០ នាក់នៅក្នុងការវាយប្រហារលើភូមិ ម៉ាយីខិនហ្គោ (Mayikengo) ក្នុងសប្តាហ៍នេះ និងសម្លាប់មនុស្សជាង ៨០ នៅក្នុងការវាយប្រហារលើភូមិផ្សេងទៀតក្នុងខេត្តដដែលនេះកាលពីសប្តាហ៍មុន។

ភាពអសន្តិសុខបានជំរុញឱ្យមានការខកចិត្តពីសាធារណជន ដែលនាំទៅដល់ការសម្លាប់ទាហាននៅក្នុងទឹកដី លូបេរ៉ូ (Lubero) ដោយហ្វូងបាតុករ កាលពីថ្ងៃសុក្រ សប្ដាហ៍មុន នេះបើតាមមន្ត្រីក្នុងតំបន់ឈ្មោះ ជូលីអូ ម៉ាបាងហ្កា (Julio Mabanga) បានប្រាប់សារព័ត៌មានរ៉យទ័រ។ មន្ត្រីរូបនោះបានបន្ថែមថា កាលពីថ្ងៃសៅរ៍ ការប៉ះទង្គិចគ្នាបន្ថែមទៀតនៅក្នុងតំបន់រវាងកងកម្លាំងសន្តិសុខ និងប្រជាជនក្នុងតំបន់បាននាំឱ្យមានការស្លាប់របស់មនុស្សបីនាក់ផ្សេងទៀត។

ការតវ៉ាស្រដៀងគ្នានេះបានផ្ទុះឡើងនៅក្នុងទីក្រុង ប៊ូថេមបូ (Butembo) កាលពីថ្ងៃសៅរ៍ ដោយយុវជនរាប់រយនាក់បានចេញតវ៉ាដោយកាន់ដំបង ស្រែកពាក្យតវ៉ា និងច្រៀងចម្រៀងរិះគន់ភាពអសន្តិសុខដែលកំពុងរីករាលដាលនៅក្នុងប្រទេស៕