​ម៉ាឡេស៊ី៖ ក្រសែ​ភ្នែក​ទាំងអស់​ផ្ដោត​លើ​អនាគត​នយោបាយ ​របស់​លោកនាយក​រដ្ឋមន្ត្រី​ម៉ាឡេស៊ី Muhyiddin Yassin ខណៈ​ដែល​លោក​ត្រូវ​បាន​គេ​រំពឹង​ថា ​នឹង​ធ្វើ​សេចក្តី​ប្រកាស​អំពី​អនាគត​នយោបាយ​របស់​លោក ​បន្ទាប់ពី​បាន​ចូល​គាល់​ព្រះមហាក្សត្រ King Al-Sultan Abdullah Ri'ayatuddin Al-Mustafa Billah Shah នៅ​ថ្ងៃ​ចន្ទ ​ទី​១៦ ខែ​សីហា​នេះ​។​

​ទីភ្នាក់ងារសារព័ត៌មាន​រដ្ឋ Bernama បាន​រាយការណ៍​ថា នៅ​ពេល​ចាក​ចេញពី​លំនៅដ្ឋាន​របស់​លោកនៅ​តំបន់ Bukit Damansara នៅ​ម៉ោង ៧.៤២​នាទី​ព្រឹក លោក Muhyiddin ត្រូវ​បាន​គេ​ឃើញ​គ្រវី​ដៃ​ដាក់​បុគ្គលិក​សារព័ត៌មាន ​ដែល​បាន​នៅ​ជុំវិញ​តំបន់​តាំង​ពី​ព្រឹក​ព្រលឹម​។ សារព័ត៌មាន​ The Star បាន​រាយការណ៍​ថា​ លោក​នឹង​ចូល​គាល់​ព្រះមហាក្សត្រ​នៅ​ម៉ោង ១១.៣០​នាទី​ព្រឹក​ ជាទី​ដែល​លោក​ត្រូវ​បាន​គេ​រំពឹង​ថា ​នឹង​ប្រកាស​ជា​ផ្លូវការ​ពី​ការលាលែង​ពី​តំណែង​ជា​នាយករដ្ឋមន្ត្រី​។​ ​សារព័ត៌មាន​ក្នុងស្រុក Malaysiakini បាន​រាយការណ៍​ថា នាយករដ្ឋមន្ត្រី​ម៉ាឡេស៊ី​ លោក Muhyiddin Yassin នឹង​លាលែង​ពី​តំណែង​នៅ​ថ្ងៃ​ចន្ទ​នេះ បន្ទាប់ពី​បាត់បង់​សំឡេង​ភាគច្រើន​ដោយសារ​ទំនាស់​ នៅ​ក្នុង​ក្រុម​បក្ស​ចម្រុះ​ដែល​កំពុង​កាន់អំណាច​។​

​ប្រសិនបើ​មានការ​បញ្ជាក់​ការលាលែង​ពី​តំណែង​របស់​លោក Muhyiddin នឹង​បញ្ចប់​ភាព​ច្របូកច្របល់​រយៈពេល ១៧ខែ​នៅ​ក្នុង​ការ​កាន់​តំណែង ​ប៉ុន្តែ​ក៏​នាំមក​នូវ​ភាព​មិន​ច្បាស់​លាស់​បន្ថែម​ទៀត​ដល់​ប្រទេស​ម៉ាឡេស៊ី​ផង​ដែរ​ ខណៈ​ដែល​ប្រទេស​នេះ​កំពុង​ប្រឈម​នឹង​ការ​កើន​ឡើង​នៃ​ករណី​ឆ្លង​វីរុស Covid-19 និង​វិបត្តិ​សេដ្ឋកិច្ច​។​ គេ​ពុំ​បាន​ដឹង​មិន​ច្បាស់​ភ្លាមៗ​ទេ​ថា ​អ្នកណា​អាច​បង្កើត​រដ្ឋាភិបាល​បន្ទាប់ ដោយ​មិន​មាន​សំឡេង​ភាគច្រើន​នៅ​ក្នុង​សភា ឬ​ថា​តើ​ការបោះឆ្នោត​អាច​ត្រូវ​បាន​ធ្វើឡើង​ក្នុងអំឡុងពេល​មាន​ជំងឺ​រាតត្បាត​សកល ឬ​យ៉ាងណា​៕

អត្ថបទ៖ សុខមាន