ប្រជាជនមូស្លីម នៅជុំវិញពិភពលោក កំពុងប្រារព្ធពិធីបុណ្យ Eid al-Adha ឬពិធីបុណ្យនៃការបូជា ដែលរំលឹកដល់ឆន្ទៈរបស់ព្យាការី Ibrahim ក្នុងការបូជាកូនប្រុសរបស់លោក ជាទង្វើនៃការគោរពប្រតិបត្តិចំពោះព្រះ មុនពេលដែលព្រះព្រទានសត្វចៀម នៅក្នុងកន្លែងរបស់លោក។

ជាផ្នែកមួយនៃពិធីបុណ្យ ដែលធ្វើឡើងបន្ទាប់ពីធម្មយាត្រា បុណ្យហាជីប្រចាំឆ្នាំ អ្នកថ្វាយបង្គំ ជាធម្មតាសម្លាប់សត្វចៀម និងផ្តល់សាច់មួយផ្នែកដល់ប្រជាជនក្រីក្រ។ ការប្រារព្ធពិធីបុណ្យនៅឆ្នាំនេះ បានធ្វើឡើងក្នុងស្រមោលនៃសង្រ្គាមរបស់អ៊ីស្រាអែលនៅតំបន់ហ្កាហ្សា ដែលបានរុញច្រានតំបន់មជ្ឈិមបូព៌ាទៅកាន់មាត់ជ្រោះនៃជម្លោះក្នុងតំបន់។ ប្រជាជនប៉ាឡេស្ទីន នៅតំបន់ហ្កាហ្សាស្ទ្រីប មិនអាចប្រារព្ធពិធីបុណ្យ Eid al-Adha ដូចដែលពួកគេបានធ្វើកាលពីឆ្នាំមុនៗនោះទេ។

នៅភាគខាងត្បូងទីក្រុង Khan Younis មនុស្សរាប់សិបនាក់ បានមកប្រមូលផ្តុំគ្នា កាលពីថ្ងៃអាទិត្យនៅជិតវិហារអ៊ីស្លាមដែលត្រូវបានបំផ្លាញមួយកន្លែងដើម្បីធ្វើការអធិស្ឋានសម្រាប់បុណ្យ Eid ។ ពួកគេត្រូវបានហ៊ុមព័ទ្ធទៅដោយកម្ទេចកម្ទី នៃលំនៅឋានដែលបាក់រលំ។ នៅទីក្រុង Deir el-Balah តំបន់ហ្កាហ្សាភាគកណ្តាល ប្រជាជនមូស្លីម បានធ្វើការបួងសួងរបស់ពួកគេនៅក្នុងទីជម្រកសាលារៀនដែលត្រូវបានផ្លាស់ប្តូរទៅជាទីជម្រក។ មនុស្សមួយចំនួនរួមទាំងស្ត្រី និងកុមារ បានធ្វើដំណើរទៅកាន់ទីបញ្ចុះសព ដើម្បីទៅមើលផ្នូរមនុស្សជាទីស្រឡាញ់។

អ្នកសារព័ត៌មាន Al Jazeera ដែលរាយការណ៍ពីទីក្រុង Deir el-Balah បាននិយាយថា ពលរដ្ឋប៉ាឡេស្ទីន កំពុងព្យាយាមប្រកាន់ខ្ជាប់នូវអារម្មណ៍នៃក្តីសង្ឃឹម។ ប្រជាជនប៉ាឡេស្ទីន កំពុងព្យាយាមធ្វើឱ្យអស់ពីសមត្ថភាពរបស់ពួកគេ ទោះបីជាអ៊ីស្រាអែល នៅបន្តការឈ្លានពានក៏ដោយ ដើម្បីនាំយកសុភមង្គលដល់កុមារតូចៗ ខណៈកុមារភាគច្រើន ក្រោកឡើងនៅថ្ងៃនេះ ដើម្បីប្រារព្ធពិធីបុណ្យ Eid ដោយគ្មានឪពុកម្តាយរបស់ពួកគេ។

ការិយាល័យប្រព័ន្ធផ្សព្វផ្សាយរដ្ឋាភិបាលនៅតំបន់ហ្កាហ្សា បាននិយាយថា អ៊ីស្រាអែល កំពុងរារាំងការនាំចូលនៃសត្វសម្រាប់ថ្វាយបូជា ទៅក្នុងតំបន់ហ៊ុមព័ទ្ធហ្កាហ្សា ដូច្នេះបានរារាំងប្រជាជនប៉ាឡេស្ទីន ពីការធ្វើពិធីបូជា ជាផ្នែកនៃពិធីបុណ្យ Eid al-Adha ។