ឧត្ដរមានជ័យ៖ លោក ហេង គឹមស្រុន នាយកមជ្ឈមណ្ឌលបណ្តុះបណ្តាលវិជ្ជាជីវៈ​ខេត្ត​ឧត្តរមានជ័យ បាន ធ្វើការអំពាវនាវជាថ្មីម្ដងទៀតដល់យុវជននៅក្នុងគ្រួសារក្រីក្រ និងងាយរង​ហានិភ័យ​ គួរតែនាំគ្នាចុះឈ្មោះ ចូលរៀនជំនាញបច្ចេកទេសវគ្គ២ ដែលនឹងចាប់​ផ្ដើម​នៅ​ពេលឆាប់​ៗ​ខាង​មុខនេះ ខណៈការទទួលពាក្យ កំពុងដំណើរការនៅមជ្ឈមណ្ឌលបណ្តុះបណ្តាលវិជ្ជាជីវៈ ។

លោក បានឱ្យដឹងថា មកដល់ពេលនេះ ការចុះឈ្មោះចូលរៀនជំនាញបច្ចេកទេសវគ្គ២ របស់យុវ ជន យុវនារី នៅមានចំនួនតិចនៅឡើយ មិនទាន់គ្រប់ចំណួនបើកថ្នាក់បណ្ដុះបណ្ដាលនោះទេ។

លោក​បាន​បញ្ជាក់ថា ការបណ្ដុះបណ្ដាលជំនាញវគ្គពីរនេះ ក៏មិនខុសពីវគ្គទី១នោះដែរ គឺមជ្ឈ មណ្ឌល បានកំណត់ជ្រើសរើសមុខជំនាញសិក្សា ចំនួន៦ជំនាញ រួមមាន អ៊ុតសក់ កុំព្យូទ័រ ជួស​ជុល​ម៉ាស៊ីន ត្រជាក់ ថែទាំរថយន្ត ជាងកំបោរ និងជំនាញអគ្គិសនី ។

ការចុះឈ្មោះចូលរៀន គឺយុវជន យុវនារី ដែលមកពីគ្រួសារក្រីក្រ និងងាយរងហានិភ័យ ត្រូវបាន ផ្ដល់​ទីតាំងសម្រាប់ស្នាក់នៅ និងការឧបត្ថម្ភសាច់ប្រាក់ក្នុងមួយខែ ម្ភៃប្រាំបីម៉ឺនរៀល ផងដែរ ៕