សាលារៀនមួយចំនួនក្នុងពេលបច្ចុប្បន្ននេះ បានចាប់ផ្ដើមអនុវត្តការបន្ថែមម៉ោងសិក្សា ដើម្បី​បំប៉ន​ដល់​សិស្សដែលសិក្សាខ្សោយ ក៏ដូចជាសិស្សទូទៅផងដែរ។ ការបន្ថែមម៉ោង​សិក្សា​នេះ​គឺ​អនុវ​ត្ត​ក្រោម​គោល​ដៅក្នុងការបណ្ដុះធនធានមនុស្ស ក៏ដូចជាអនុវត្តតាមអនុសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលជំរុញឱ្យសាលារៀនអនុវត្តលើការងារនេះ។

បច្ចុប្បន្នសាលារៀនមួយចំនួន បានចាប់ផ្ដើមអនុវត្តការបន្ថែមម៉ោងសិក្សា សម្រាប់​បំប៉ន​ដល់​សិស្ស​ដែល​រៀន​ខ្សោយ ក៏ដូចជាសិស្សទូទៅ។ សាលារៀនខ្លះ ពុំទាន់អនុវត្តបាននោះទេ ដោយសាលា កំពុង​រៀបចំបញ្ជីឈ្មោះសិស្សគោលដៅ ជ្រើសរើសគ្រូ ក៏ដូចជារៀបចំថ្នាក់រៀន សម្រាប់​ការ​បន្ថែម​ម៉ោង​សិក្សា​នេះផងដែរ។ ក្នុងនោះវិទ្យាល័យ ហ៊ុនសែនសេរីភាព ស្ថិតនៅក្រុងតាខ្មៅ ខេត្តកណ្ដាល បានជ្រើសរើសថ្ងៃ សៅរ៍ និងថ្ងៃអាទិត្យ សម្រាប់ការសិក្សាបំប៉នទៅដល់សិស្ស។ ការ​បន្ថែម​ម៉ោង​សិក្សានេះ បានអនុវត្តចាប់តាំងពី ដើមខែ មិថុនា។

លោក ស្រី ស្រឿន នាយករងវិទ្យាល័យហ៊ុន សែន សេរីភាព លើកឡើងថា ការបន្ថែម​ម៉ោង​សិក្សា​បំប៉ន​សិស្ស​ដែលសិក្សាខ្សោយ និងសិស្សទូទៅ ក្នុងដំណាក់កាលដំបូង គឺសាលាអាច​អនុវត្ត​បាន​សម្រាប់​សិស្ស​សិក្សាថ្នាក់ទី ៩ និងថ្នាក់ទី ១២ ពុំទាន់អាចអនុវត្តគ្រប់កម្រិតថ្នាក់បាននោះទេ។

លោកនាយករង លើកឡើងដែរថា សម្រាប់ការងារបន្ទាប់ គឺសាលានឹង​ធ្វើកា​រ​តាម​ដាន​លទ្ធផល​សិក្សា​របស់​សិស្ស។ ការតាមដានដោយផ្អែកលើលទ្ធផលប្រឡងតេស្តស្តង់ដា នៅខែក្រោយ ដើម្បី​ដឹង​ច្បាស់​ពី​ភាពប្រែប្រួលមុននិងក្រោយការបន្ថែមម៉ោងសិក្សា។

សម្រាប់សិស្សដែលបានចូលសិក្សាថ្នាក់បំប៉ន ចាប់តាំងពីដើមខែ មិថុនា មកនេះ បង្ហាញ​នូវ​ភាព​សប្បាយ​ចិត្ត​គ្រប់គ្នា។ ភាពសប្បាយចិត្ត ដោយសារពួកគេមើលឃើញថា ការបន្ថែមម៉ោង​សិក្សា​នេះ បានជួយបំពេញចន្លោះខ្វះខាត របស់ពួកគេ។ សិស្សថា្នក់ទី ១២ លើកឡើងថា ពួកគេ កាន់​តែ​មាន​ភាពរួចរាល់ សម្រាប់ការប្រឡងបញ្ចប់ថ្នាក់វិទ្យាល័យខាងមុខ។ ពួកគេ ក៏សូមអរគុណ ដល់​គ្រូបង្រៀន ក៏ដូចជាគណៈគ្រប់គ្រងសាលា ដែលបានរៀបចំឱ្យមានការសិក្សាបន្ថែមនេះឡើង។

សូមជម្រាបថា ពាក់ព័ន្ធនឹងការបន្ថែមម៉ោងសិក្សានេះ សម្ដេច ធិបតី នាយករដ្ឋមន្ត្រីកម្ពុជា កាល​ពី​ថ្ងៃទី៦ ខែមិថុនា បានលើកឡើងពីការបន្ថែមម៉ោងសិក្សា ២ម៉ោងសម្រាប់សិស្សថ្នាក់បឋមសិក្សា។ សម្ដេចបញ្ជាប់ថា ការថែមម៉ោងសិក្សា រយៈពេល ២ម៉ោង នៅពេលល្ងាច ចាត់ទុកជា​ការ​សិក្សា​បំប៉ន​សម្រា​ប់សិស្សឱ្យកាន់តែរឹងមាំ។ ក្នុងការអនុវត្តការងារនេះ រដ្ឋ ជាអ្នករ៉ាប់រង លើការលើក​ទឹក​ចិត្ត​ដល់គ្រូ​៕ អត្ថបទ៖គឹមហុក