ក្នុងនាមជាប្រជាពលរដ្ឋនៅក្នុងខេត្តព្រៃវែង ក៏ដូចជាតំណាងប្រជាពលរដ្ឋជាង១លាន២សែននាក់ ដែល​កំពុងរស់នៅក្នុងខេត្តព្រៃវែងទាំងមូលឯកឧត្តម សួន សុម៉ាលីន អភិបាលខេត្តព្រៃវែង អាជ្ញាធរ រួមនិងប្រជាពលរដ្ឋ ពិតជាមានមោទនភាពខ្លាំងណាស់ ព្រោះគម្រោងព្រែកជីកហ្វូណន តេជោ ផ្តល់ប្រយោជន៍សេដ្ឋកិច្ចយ៉ាងខ្លាំងបំផុតដល់ព្រះរាជាណាចក្រកម្ពុជា ជាពិសេស​សម្រាប់​ប្រជា​ពលរដ្ឋ និងសម្រាប់យុវជនជំនាន់ក្រោយ ក្នុងការរស់នៅប្រកបដោយសុខសន្តិភាព និង​ការ​អភិវឌ្ឍ។

ការថ្លែងរបស់ឯកឧត្តម សួន សុម៉ាលីន អភិបាលខេត្តព្រៃវែង យ៉ាងដូច្នេះ នាឱកាសដែល​គ្រូពេទ្យ​ស្ម័គ្រ​ចិត្តឯកឧត្តម ហ៊ុន ម៉ានី ចំនួន៨៨០នាក់ ចុះអប់រំផ្សព្វផ្សាយអប់រំសុខភាព វគ្គសង្រ្គោះបឋម យុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស ព្រមទាំងពិនិត្យ ព្យាបាល​ជំងឺជូនប្រជាពលរដ្ឋផ្តល់សេវាដោយឥតគិតថ្លៃ និងឥតគិតថវិកាបេសកកម្ម បានចំនួន​១១៥៥៦​នាក់ ក្នុងនោះស្រី្តមានចំនួន៧៧៤២នាក់ នៅវិទ្យាល័យរស្មីសាមគ្គី ខេត្តព្រៃវែង ដោយ​សហការ​ជាមួយរដ្ឋបាលខេត្តព្រៃវែង មនី្ទរសុខាភិបាលខេត្ត ក្រុមការងារ​រាជរដ្ឋាភិបា​ល​ចុះមូល​ដ្ឋាន​ខេត្ត សហភាពសហព័ន្ធយុវជនកម្ពុជាខេត្ត កាលពីថ្ងៃទី១៦ ខែមិថុនា ឆ្នាំ២០២៤។

ឯកឧត្តម សួន សុម៉ាលីន រួមនិងអាជ្ញាធរ ប្រជាពលរដ្ឋ បានលើកឡើងរួមគ្នាទៀតថា គម្រោង​ព្រែកជីកហ្វូណនតេជោ គឺជាសមិទ្ធផលជាប្រវតិ្តសាស្រ្ត ដែលមានផលប្រយោជន៍​ទៅ​លើ​ការ​កាត់​បន្ថយ នៃការចំណាយផ្នែកដឹកជញ្ជូនផ្លូវទឹក ការស្រោចស្រពកសិកម្ម ការធ្វើវារីវប្បកម្ម ជាពិសេស​មាន​ផល​ប្រយោជន៍​ធំធេង​សម្រាប់​ប្រជាពលរដ្ឋ​កម្ពុជា​ និង​ប្រទេសជាតិទាំងមូលផងដែរ។

សូមបញ្ជាក់ផងដែរ កាលពីថ្ងៃទី៦ ខែមិថុនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីសម្ពោធបើកដំណើរការអាជីវកម្មជាផ្លូវការ “កំពង់​ផែពហុបំណងកំពត” របស់ក្រុមហ៊ុនកំពតផត ស្ថិតនៅភូមិគីឡូ១២ សង្កាត់កោះតូច និង​សង្កាត់បឹងទូក ក្រុងបូកគោ ខេត្តកំពត។ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានប្រកាសកំណត់យកថ្ងៃទី៥ ខែសីហា ឆ្នាំ២០២៤ខាងមុខនេះ ក្នុងការបើក​ការដ្ឋាន​គម្រោង​ពែ្រកជីកហ្វូណនតេជោ ដែលព្រែកជីកនេះ នឹងផ្ដល់អត្ថប្រយោជន៍ជាច្រើន សម្រាប់កម្ពុជា ដែល​នឹង​ផ្ដល់​លទ្ធភាពឱ្យកម្ពុជា មានឯករាជ្យភាពលើការដឹកជញ្ជូន និងផ្ដល់ផលប្រយោជន៍ ដល់​ប្រជាពលរដ្ឋ​នៅខេត្តទិសនិរតី ក៏ដូចជាក្នុងក្របខ័ណ្ឌទូទាំងប្រទេស ដើម្បីកសាងឱ្យបាន​ព្រែក​ជីក​ប្រវត្តិសាស្ត្រ​ក្នុងទឹកដីនៃព្រះរាជាណាចក្រកម្ពុជា ឈានទៅសម្រេច​បំណង​ប្រាថ្នា​របស់​ប្រជាជន​កម្ពុជា ដែលចង់បានឃើញគម្រោងព្រែកជីកនេះ ក្លាយជាសមិទ្ធផលជាក់ស្ដែងនៅលើដី។ សម្តេច​ធិបតី ក៏បានអរគុណដល់ប្រជាពលរដ្ឋកម្ពុជា ទាំងនៅទូទាំងប្រទេស ក៏ដូច​ជា​នៅទូទាំង​ពិភព​លោក ដែលចូលរួមបង្ហាញជំហរគាំទ្រគម្រោងប្រវត្ដិសាស្ដ្រ ដើម្បីប្រយោជន៍ជាតិមួយនេះ យ៉ាង​ច្រើន​សន្ធឹកសន្ធាប់ ហើយអំពាវនាវឱ្យបន្តចូលរួមរហូតដល់គម្រោងនេះលេចចេញជារូបរាងទ្បើង និងរួចរាល់ជាស្ថាពរ៕ អត្ថបទ រដ្ឋា