ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ថ្លែងថា រយៈ​ពេល​២៦​ឆ្នាំ ក្រុមប្រឹក្សាធម្មនុញ្ញជំរុញម៉ឺងម៉ាត់លើការពង្រឹងច្បាប់រដ្ឋធម្មនុញ្ញកម្ពុជា។

នៅថ្ងៃទី១៧ ខែមិថុនា ឆ្នាំ២០២៤ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធាន​ក្រុម​ប្រឹក្សា​ធម្មនុញ្ញ បានអញ្ជើញជាអធិបតីក្នុងពិធីអបអរសាទរ ទិវាខួបកំណើត​គម្រប់​២៦​ឆ្នាំ​របស់​ក្រុម​ប្រឹក្សា​ធម្មនុញ្ញ (១៥ មិថុនា ១៩៩៨-១៥ មិថុនា ២០២៤)។

ឯកឧត្តមកិត្តិនីតិកោសលបណ្ឌិត មានប្រសាសន៍ថា ក្រុមប្រឹក្សា​ធម្មនុញ្ញ​ជា​ស្ថាប័ន​កំពូល​តែ​មួយ​គត់ ដែលមានសមត្ថកិច្ចសម្រេចពីមោឃភាពនិងចាត់ទុកជាអសារសូន្យ ចំពោះ​ការ​អនុម័ត​ទាំង​ឡាយ​របស់​រដ្ឋសភា ដែលផ្ទុយនឹងគោលការណ៍រក្សាការពារឯករាជ្យ អធិបតេយ្យភាព បូរណភាព​ទឹកដី នៃព្រះរាជាណាចក្រកម្ពុជា ហើយដែលនាំឱ្យប៉ះពាល់ដល់ឯកភាពនយោបាយ ឬការ​គ្រប់​គ្រង​រដ្ឋបាលរបស់ប្រទេសជាតិ។

ឯកឧត្តមបញ្ជាក់ថា រយៈពេល២៦ឆ្នាំកន្កងមកនេះ ក្រុមប្រឹក្សាធម្មនុញ្ញបានអនុវត្តយ៉ាងខ្ជាប់ខ្ជួន ដោយ​គោរពទៅតាមច្បាប់រដ្ឋធម្មនុញ្ញកំណត់ទាំងតួនាទី និងភារកិច្ច ដោយ​ធានា​ការ​គោរព​ចំពោះ​រដ្ឋ​ធម្មនុញ្ញ បកស្រាយរដ្ឋធម្មនុញ្ញនិងច្បាប់ ដែលរដ្ឋសភាបានអនុម័ត និង ព្រឹទ្ធសភា​បាន​ពិនិត្យ​ចប់​សព្វ​គ្រប់​ហើយ ក្នុងក្របខ័ណ្ឌនៃការត្រួតពិនិត្យលើធម្មនុញ្ញភាពរបស់រដ្ឋធម្មនុញ្ញ។

ឆ្លៀត​ក្នុងកាសនោះឯកឧត្តមកិត្តិនីតិកោសលបណ្ឌិត អ៊ឹម ឈុនលឹម លើកឡើងថា ក្នុង​ប្រវត្តិសាស្ត្រ​នៃ​ការចាប់កំណើតធម្មនុញ្ញនិយម កម្ពុជាពុំធ្លាប់បានកសាងវិមានអនុស្សាវរីយ៍ ដើម្បី​ជា​និមិត្ត​រូប និងជាទីសម្រាប់ប្រារព្ធពិធីអបអរខួបរដ្ឋធម្មនុញ្ញ ដែលជាច្បាប់​កំពូល​រប​ស់​ប្រទេស​នៅ​ឡើយ។ ក្រុមប្រឹក្សាធម្មនុញ្ញយល់ឃើញថា នេះជាសម័យកាលដ៏សមគួរ ក្នុងការស្ថាបនា​វិមាន​រដ្ឋ​ធម្មនុញ្ញ ទុកជាគោលចារឹក និងជាមរតកដ៏វិសេសវិសាលនៅក្នុងសម័យតេជោសន្តិភាព សម្រាប់​កូន​ចៅ​ជំនាន់ក្រោយបានចងចាំនូវប្រវត្តិ និងអត្ថន័យ នៃការកសាងរដ្ឋធម្មនុញ្ញ ជាសមិទ្ធផល និង​ជា​ចំណង​ដៃ​ជាប្រវត្តិសាស្ត្រ ដែលកើតចេញ ពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែល​មាន​ព្រះករុណាព្រះបាទសម្ដេច ព្រះនរោត្ដមសីហនុ (ព្រះបរមរតនកោដ្ឋ) និងសម្តេចតេជោ ហ៊ុន សែន ជាអគ្គស្ថាបនិកកំពូល រួមជាមួយភាគីជាតិ និងអន្តរជាតិ៕ អត្ថបទ សេក ឧត្តម