ភ្នំពេញ ៖ ក្នុងគោលដៅជំរុញឲ្យកម្ពុជាសម្រេចបានជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ រាជរដ្ឋាភិបាលបានកំពុងខិតខំប្រឹងប្រែងធ្វើឱ្យពលរដ្ឋមានជំនាញ និងចំណូល ដើម្បីធានាការអភិវឌ្ឍប្រកបដោយនិរន្តរភាព។

​ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅក្នុងពិធីបិទទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៧ ក្រោមប្រធានបទរៀនឱ្យចប់ឱ្យចេះ ឱ្យមានការងារ កាលពីរសៀលថ្ងៃទី១៦ មិថុនា ឆ្នាំ២០២៤នេះ បានថ្លែងថា ប្រជាពលរដ្ឋគួរទទួលបានឱកាសការងារ និងមានជំនាញច្បាស់លាស់ ដើម្បីសម្រេចគោលដៅខាងលើនេះ ព្រោះថា បើប្រជាពលរដ្ឋមិនមានការទទួលបានឱកាសការងារ និងមានជំនាញនោះទេ កម្ពុជា ក៏មិនអាចសម្រេចនូវគោលដៅនេះបានដែរ។ 

ឯកឧត្តមរដ្ឋមន្រ្តីបន្តថា ក្រោមការដឹកនាំរបស់សម្តេចនាយករដ្ឋមន្រ្តី ហ៊ុន ម៉ាណែត រដ្ឋាភិបាលបានដាក់ចេញនូវការបណ្តុះបណ្តាលជំនាញបច្ចេកទេស និងវិជ្ជាជីវៈទៅដល់គ្រួសារក្រីក្រ និងគ្រួសារងាយរងហានិភ័យ១លាន៥សែននាក់ដើម្បីអាចក្លាយជាកម្លាំងពលកម្មដ៏មានសក្តានុពលក្នុងសង្វាក់ការងារ ក្នុងការចូលរួមចំណែកជួយកសាងអភិវឌ្ឍប្រទេសជាតិ និងដើម្បីឆ្លើយតបទៅនឹងតម្រូវការទីផ្សារការងារនាពេលខាងមុខ និងកាត់បន្ថយភាពក្រីក្រជាដើម។

លោក អ៊ុយ សុខន គ្រូបច្ចេកទេស នៃវិទ្យាស្ថានបច្ចេកទេស ហ្ស៊ី វ៉េ សេ (JVC) ក្នុងបទសម្ភាសន៍ជាមួយព័ត៌មាន ប៊ីធីវី បានលើកឡើងថា យុវជនគួរតែសម្រេចចិត្ដឲ្យបានត្រឹមត្រូវ មុននឹងចាប់យកជំនាញអ្វីមួយក្នុងការឆ្លើយតបទីផ្សារការងារ ដើម្បីធ្វើឱ្យអនាគតមានភាពល្អប្រសើរ។ ជាពិសេស យុវជន សិស្ស និស្សិត ត្រូវធានាលើការសិក្សា មានទាំងស្នាដៃ និងគុណភាព ដើម្បីអាចទាក់ទាញការវិនិយោគ និងបង្កើនឱកាសការងារក្នុងស្រុកឱ្យបានកាន់តែច្រើនជាងនេះបន្ថែមទៀត ដើម្បីលើកកម្ពស់ជីវភាព និងជួយជំរុញការអភិវឌ្ឍប្រទេស។

សូមបញ្ជាក់ថា ដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និងបច្ចេកទេសឲ្យកាន់តែមានប្រសិទ្ធិភាពបន្ថែមទៀត ក្រសួងការងារ និងបណ្តុះបណ្តាលវិជ្ជាជីវៈ បានចុះហត្ថលេខាលើអនុស្សរណៈនៃការយោគយល់គ្នា ជាមួយសភាពាណិជ្ជកម្មកម្ពុជា និងសមាគមនិយោជកចំនួន១៧ ដើម្បីបង្កើតកិច្ចសហប្រតិបត្តិការ រវាងវិស័យរដ្ឋ និងវិស័យឯកជន ក្នុងការផ្តល់ជំនាញ បង្កើនជំនាញ ផ្លាស់ប្តូរជំនាញ និងបង្កើនផលិតភាពការងារ ដើម្បីធានាថា ពលរដ្ឋកម្ពុជាមានជំនាញមួយពិតប្រាកដ ដែលអាចទទួលបានការងារ និងមុខរបរសមរម្យ និងមានស្ថិរភាពចំណូលស្របតាមការអំពាវនាវរបស់សម្តេចនាយករដ្ឋមន្រ្តីនៃកម្ពុជា៕

អត្ថបទ ឈិត បូរ៉ាវី