ឧត្តរមានជ័យ ៖ សាខាកាកបាទក្រហមកម្ពុជាខេត្ត និងរដ្ឋបាលខេត្តឧត្តរមានជ័យបានរៀបចំប្រារព្ធពិធីធ្វើបុណ្យ សូត្រមិន្តចំម្រើនព្រះជន្មសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកក្តិយសកាកបាទក្រហមកម្ពុជា នៅក្នុងឱកាស ព្រះជន្មគម្រប់ ៨៨ យាងចូល៨៩ ព្រះវស្សា ដែលនិងប្រព្រឹត្តទៅ នៅព្រឹកថ្ងៃទី១៧ ខែមិថុនាឆ្នាំ២០២៤នេះ នៅ បរិវេណវត្តពុទ្ធោភាវនា ស្ថិតនៅឃុំ ត្រពាំងតាវ ស្រុកអន្លង់វែងខេត្តឧត្តរមានជ័យ។

ក្នុងពិធីនោះដែរឯកឧត្តម ឃិន ញ៉ាណ អនុប្រធានអចិន្ត្រៃយ៍សាខាកាកបាទក្រហមកម្ពុជាខេត្តឧត្តរមានជ័យនិងមានការនិមន្តចូលរួមពី ព្រះមេគុណខេត្ដ គណៈធម្មយុត្តិក និងថ្នាក់ដឹកនាំខេត្តក្រុមប្រឹក្សាខេត្ត អស់លោក លោកស្រី អភិបាល ក្រុង ស្រុក និងបងប្អូនប្រជាពលរដ្ឋសិស្សានុសិស្សបានចូលរួមជាច្រើននាក់ផងដែរ។

ឯកឧត្តម ឃិន ញ៉ាណ អនុ ប្រធានគណៈកម្មាធិការសាខា បានថ្វាយព្រះពរចំពោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីគោរព សក្ការៈដ៏ខ្ពង់ខ្ពស់ ដោយមានខ្លឹមសារយ៉ាងដូច្នេះថា ទូលព្រះបង្គំយើងខ្ញុំទាំងគ្នាជាកូន ជាចៅ ចៅទួត សូមព្រះរាជាអនុញ្ញាតដ៏ខ្ពង់ខ្ពស់ ក្រាបបង្គំទូលថ្វាយសព្ទសាធុកាពរ សូមឱនកាយលើកហត្ថប្រណម្យបួងសួង ព្រះរតនត្រ័យកែវទាំងបី គុណបុណ្យវត្ថុស័ក្តិសិទ្ធិទាំងអស់នៅលើលោក ជាពិសេសសូមទេវតា រក្សាព្រះមហាស្វេតច្ឆត្រ បារមីព្រះវិញ្ញាណក្ខន្ធនៃអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ សូមឫទី្ធតេជៈបារមីខ្លាំងក្លាទាំងអស់ សូមប្រោសព្រះរាជប្រទាន ប្រោះព្រំប្រសិទ្ធពរជ័យ សិរីសួស្តី ថ្វាយសម្តេចព្រះមហាក្សត្រី ព្រះវររាជមាតា ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះបរមសុខគ្រប់ប្រការមានព្រះរាជសុខភាពល្អបរិបូរណ៍ ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំនៃប្រជារាស្រ្ត ជាកូន ចៅ ចៅទួត របស់ព្រះអង្គទូទាំងប្រទេសយូរអង្វែងរៀងដរាបតទៅផងដែរ។

នៅក្នុងឱកាសនោះដែរសាខាខេត្តក៏បានប្រគេនទេយ្យវត្ថុ និងបច្ច័យចំពោះព្រះសង្ឃសម្រាប់ទុកប្រើប្រាស់ក្នុងទីអារាមរួមមាន៖ អង្ករ , ទឹកត្រី មី , ទឹកសុទ្ធ , ត្រីខកំប៉ុង ២កេស, ទឹកផ្លែឈើ ១០កេស, ទឹកក្រូច , ស្ករស និងបច្ច័យ មួយចំនួនផងដែរ៕ ដោយ ៖ សារិទ្ធិ