​ស៊ី​ហ្គេម៖ គណៈកម្មាធិការ​ជាតិ​រៀបចំ​ការប្រកួត​កីឡា​អាស៊ីអាគ្នេយ៍​លើក​ទី​៣២ ឆ្នាំ​២០២៣ (CAMSOC) នៅ​ព្រឹក​ថ្ងៃទី​១៧ ខែសីហា​នេះបានរៀបចំ​សន្និបាត​បូកសរុប​លទ្ធផល​ការងារ​ឆមាស​ទី​១ និង​លើក​ទិសដៅ​បន្ដ​ឆមាស​ទី​២ ឆ្នាំ​២០២១ តាម​ប្រព័ន្ធ Zoom ក្រោម​អធិបតីភាព​ដ៏​ខ្ពស់​ខ្ពស់​របស់​សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី​ក្រសួងការពារជាតិ និង​ជា​ប្រធាន​គណៈកម្មាធិការ​ជាតិ CAMSOC។​

​ក្នុង​សន្និបាត​ពាក់កណ្ដាល​ឆ្នាំនេះ សម្ដេច​ពិជ័យ​សេនា ទៀ បាញ់ បាន​វាយតម្លៃ​ខ្ពស់ចំពោះ​លទ្ធផល​ការងារ​ក្នុង​ឆមាស​ទី​១ ទោះបី​ស្ថិតក្នុង​បរិបទ​កូ​វីដ​-១៩ ថ្នាក់ដឹកនាំ​គ្រប់​ក្រសួង​-​ស្ថាប័ន ដែលជា​សមាជិក​គណៈកម្មាធិកា​រ​ជាតិ CAMSOC បាន​ខិតខំ​ប្រឹងប្រែងពុះពារ​ឧបសគ្គ និង​បំពេញការងាររហូត​ទទួលបាន​សិទ្ធ​ផល​យ៉ាង​ល្អប្រសើរ ហើយ​សម្ដេច​បាន​ជំរុញ​ឲ្យ​ថ្នាក់ដឹកនាំ​ពាក់ព័ន្ធ​ទាំងអស់បន្ដ​ខិតខំ​បន្ថែមទៀត ពិសេស​ដោះស្រាយ​រាល់​បញ្ហា​ប្រឈម​សេសសល់ ដើម្បី​ឆ្ពោះទៅរក​ភាពជោគជ័យ​ក្នុង​ព្រឹត្តិការណ៍​ស៊ី​ហ្គេម និង​អាស៊ាន​ប៉ា​រ៉ា​ហ្គេមឆ្នាំ​២០២៣។​

​គួរ​បញ្ជាក់ថា ក្រៅពី​បូកសរុប​លទ្ធផល​ការងារ​ឆមាស​ទី​១ និង​លើក​ទិសដៅ​បន្ដ​ឆមាស​ទី​២ ឆ្នាំ​២០២១ សម្ដេច​ពិជ័យ​សេនា ទៀ បាញ់ ប្រធាន​គណៈកម្មាធិការ​ជាតិ CAMSOC ក៏បាន​ប្រកាស​បើក​យុទ្ធនា​ការអប់រំ​សង្គមនៃ​ការផ្សព្វផ្សាយ​អំពី SEA Games-ASEAN Para Games 2023 ជា​ផ្លូវការ​ផងដែរ៕

​អត្ថបទ៖ លី ឈុន​ឡា