របាយការណ៍ បាននិយាយថា ទាហានរុស្ស៊ី បាននិងកំពុងចុះចាញ់នឹងកងពលតូចប្រយុទ្ធសម្រាំងរបស់ អ៊ុយក្រែន នៅក្នុងទីក្រុង Vovchansk នៃតំបន់ខាគីវភាគខាងជើង។

វីដេអូមួយដែលបានចេញផ្សាយកាលពីថ្ងៃពុធដោយកងពលតូចវាយប្រហារទី៣របស់អ៊ុយក្រែន ហាក់ដូចជាបង្ហាញទាហានរុស្ស៊ី ងើបចេញពីលេណដ្ឋានមួយ ដោយដៃរបស់ពួកគេលើកពីលើក្បាលរបស់ពួកគេ ឬចងនៅពីក្រោយខ្នងរបស់ពួកគេ។

វីដេអូនេះ បានលេចចេញ ដើម្បីបញ្ជាក់ពីរបាយការណ៍ថ្មីៗដែលថា ទាហានរុស្ស៊ីរាប់សិបនាក់ បានចុះចាញ់នៅជុំវិញទីក្រុង Vovchansk ជាទីដែលការប្រយុទ្ធគ្នាយ៉ាងខ្លាំងក្លា បានផ្ទុះឡើង ចាប់តាំងពីទីក្រុងមូស្គូបានបើកការវាយលុកឆ្លងព្រំដែន ឆ្ពោះទៅកាន់ទីក្រុងធំទី២ របស់អ៊ុយក្រែនគឺទីក្រុងខាគីវ កាលពីខែមុន។

ក្រោយមក អ្នកទោសង្គ្រាមទាំងអស់ ត្រូវបានថត និងសម្ភាសន៍ ដោយអង្គុយនៅក្នុងអ្វីដែលមើលទៅដូចជាបន្ទប់រៀន។

សារព័ត៌មាន Business Insider មិនអាចផ្ទៀងផ្ទាត់វីដេអូនោះ ដោយឯករាជ្យបានទេ។

ទាហានដែលត្រូវបានចាប់ខ្លួនជាច្រើននាក់ បាននិយាយថា ពួកគេត្រូវបានបង្ខំឲ្យចូលក្នុងជួរកងទ័ពរុស្ស៊ីដោយសារបញ្ហាហិរញ្ញវត្ថុ ឬផ្លូវច្បាប់។ អ្នកខ្លះនិយាយថា ពួកគេ បានទទួលការហ្វឹកហ្វឺនតិចបំផុត គឺមួយសប្តាហ៍ មុនពេលបញ្ជូនទៅជួរមុខ។

ស្បៀងអាហារ និងទឹកមានកម្រិត ហើយជារឿយៗ ពួកគេត្រូវទិញគ្រឿងផ្គត់ផ្គង់ដោយប្រាក់ផ្ទាល់ខ្លួនរបស់ពួកគេ។

អ្នកទោសស្ទើរតែទាំងអស់ បានអះអាងថា អង្គភាពរបស់ពួកគេ បានទទួលរងការខាតបង់យ៉ាងធ្ងន់ធ្ងរ ក្នុងអំឡុងពេលនៃការវាយប្រហារប្រឆាំងនឹងទីតាំងឈរជើងរបស់អ៊ុយក្រែន។