អ៊ីស្រាអែល បានចោទប្រកាន់ថា បានវាយឆ្មក់អគារមួយដែលជារបស់ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) នៅតំបន់វេសបែង ហើយបានប្រើប្រាស់វា ជាកន្លែងសម្រាប់អ្នកបាញ់ស៊ីប។

ទីភ្នាក់ងារសារព័ត៌មានរដ្ឋប៉ាឡេស្ទីនផ្លូវការដែលគេស្គាល់ថា WAFA បានរាយការណ៍ថា កងកម្លាំងអ៊ីស្រាអែល បានឃាត់ខ្លួនជនជាតិប៉ាឡេស្ទីនម្នាក់ និងបានបង្កឲ្យអនីតិជនម្នាក់រងសបួស ជាមួយនឹងបំណែកគ្រាប់ផ្លោង នៅក្នុងជំរុំជនភៀសខ្លួន Far'a ភាគឦសាននៃទីក្រុងNablusនៃតំបន់វេសបែង ក្នុងអំឡុងពេលប្រតិបត្តិការ។

ការចាប់ខ្លួននេះ កើតឡើងនៅពេលដែលអ្នកទោសប៉ាឡេស្ទីនជិត ៩.៣០០នាក់ ត្រូវបានចាប់ខ្លួន ហើយបច្ចុប្បន្នត្រូវបានឃុំខ្លួននៅក្នុងពន្ធនាគារ និងមន្ទីរឃុំឃាំងរបស់អ៊ីស្រាអែល។ នេះបើយោងតាមសមាគមអ្នកទោសប៉ាឡេស្ទីន។ អ្នកទោសប្រហែល ២៥០នាក់ គឺជាកុមារ។

ជនជាតិប៉ាឡេស្ទីនជាង ៣.៤០០នាក់ បច្ចុប្បន្នកំពុងស្ថិតនៅក្រោម«ការឃុំខ្លួនបណ្តោះអាសន្ន» ដែលអនុញ្ញាតឲ្យមន្ត្រីអ៊ីស្រាអែលឃុំខ្លួនពួកគេ ដោយគ្មានការចោទប្រកាន់ ឬការកាត់ទោស។ អង្គការសិទ្ធិមនុស្ស Amnesty International បាននិយាយថា ការអនុវត្តបាន «កើនឡើងយ៉ាងខ្លាំង» ចាប់តាំងពីសង្រ្គាម បានផ្ទុះឡើង។ ប្រជាជនប៉ាឡេស្ទីន និងអ្នកគាំទ្ររបស់ពួកគេ តែងតែប្រៀបធៀបការអនុវត្តនេះ ទៅនឹងការចាប់ជំរិត។

ទន្ទឹមនឹងនោះ កងកម្លាំងអ៊ីស្រាអែល តែងតែវាយឆ្មក់ផ្ទះរបស់ប្រជាជនជាតិប៉ាឡេស្ទីន នៅតំបន់វេសបែង ដោយមិនចាំបាច់មានដីកាឆែកឆេរឡើយ។