អ្នកធ្វើធម្មយាត្រា ដែលជាអ្នកកាន់សាសនាឥស្លាម ក្នុងប្រទេសអារ៉ាប៊ីសាអូឌីត បាននាំគ្នាគប់ដុំថ្មដាក់ជញ្ជាំងដ៏ធំ ដោយការធ្វើបែបនេះ គឺជាការគប់ដុំថ្មនិមិត្តរូបដាក់ពួកបិសាច នៅព្រឹកថ្ងៃចន្ទ (ទី១៧ ខែមិថុនា) នេះ ដែលជាថ្ងៃទី២ នៃការប្រារព្ធពិធីនេះ។

អ្នកធ្វើធម្មយាត្រាក្នុងចំនួនដ៏ច្រើននោះ បានទៅទីក្រុង Mina ដែលមានចម្ងាយ ២-៣ គីឡូម៉ែត្រ នៅភាគខាងកើតនៃទីក្រុង Mecca បន្ទាប់ពីពួកគេបានចំណាយពេល ១យប់ នៅឯ Muzdalifa ជាកន្លែងដែលពួកគេបានប្រមូលគ្រួស ហើយគប់ទៅលើសសរថ្មដែលជានិមិត្តរូបឲ្យពួកបិសាច ពោលគឺអំពើអាក្រក់នានា។

គួរបញ្ជាក់ថា អ្នកធ្វើធម្មយាត្រាកំពុងចូលរួមក្នុងពិធីបុណ្យហាជី ដែលត្រូវបានគេចាត់ទុកថា ជាការជួបជុំតាមបែបសាសនាដ៏ធំបំផុតរបស់ពិភពលោក និងជាការបំពេញកាតព្វកិច្ចម្តង ក្នុង ១ជីវិតរបស់ខ្លួន សម្រាប់ប្រជាជនអ្នកកាន់សាសនាឥស្លាមសុខភាពរឹងមាំគ្រប់រូប ដែលអាចលៃលកទៅចូលរួមបាន។

ពិធីបុណ្យហាជី ដែលនឹងបញ្ចប់នៅថ្ងៃពុធ (ទី១៩ ខែមិថុនា) គឺជាការប្រមូលផ្តុំដ៏ធំបំផុតមួយ ក្នុងចំណោមការប្រមូលផ្ដុំដ៏ធំបំផុតរបស់ពិភពលោក ដោយគេរំពឹងថា អ្នកធ្វើធម្មយាត្រាជាង ១,៨លាននាក់ នឹងចូលរួមនៅឆ្នាំនេះ។ នេះបើយោងតាមអាជ្ញាធរស្ថិតិទូទៅរបស់អារ៉ាប៊ីសាអ៊ូឌីត៕