នាយករដ្ឋមន្ត្រីអូស្ត្រាលី លោក Anthony Albanese និងនាយករដ្ឋមន្ត្រីចិន លោក Li Qiang បានជួបគ្នា នៅថ្ងៃចន្ទ (ទី១៧ ខែមិថុនា) នេះ នៅក្នុងដំណើរទស្សនកិច្ចដំបូងទៅកាន់ប្រទេសនេះរបស់នាយករដ្ឋមន្ត្រីចិន ក្នុងរយៈពេល ២ឆ្នាំ ដោយទំនាក់ទំនងពាណិជ្ជកម្ម សន្តិសុខក្នុងតំបន់ និងបញ្ហារបស់អ្នកនិពន្ធសញ្ជាតិអូស្ត្រាលីដែលជាប់ពន្ធនាគារ ស្ថិតរបៀបវារៈរបស់ប្រទេសម្ចាស់ផ្ទះ។

គួរបញ្ជាក់ថា ដំណើរទស្សនកិច្ចរបស់លោក Li ដែលជាមន្ត្រីជាន់ខ្ពស់របស់ចិនបន្ទាប់ពីប្រធានាធិបតី លោក Xi Jinping បង្ហាញពីស្ថិរភាពក្នុងទំនាក់ទំនង រវាងសម្ព័ន្ធមិត្តសន្តិសុខរបស់សហរដ្ឋអាមេរិក និងប្រទេសមហាអំណាចសេដ្ឋកិច្ចទី២ របស់ពិភពលោក បន្ទាប់ពីមាននូវរយៈពេលតានតឹង ដែលបានឃើញថា ទីក្រុងប៉េកាំងបានរារាំងការនាំចេញរបស់អូស្ត្រាលីដែលទំហំទឹកប្រាក់ចំនួន ២០ពាន់លានដុល្លារ និងជម្លោះ ជុំវិញការការប្រឈមមុខដាក់គ្នាផ្នែកការពារជាតិ។

នៅក្នុងសុន្ទរកថាបើករបស់លោក លោក Albanese បាននិយាយថា៖ «យើងស្វាគមន៍ចំពោះការបន្តស្ថិរភាព និងការអភិវឌ្ឍនៃទំនាក់ទំនងទ្វេភាគីរបស់យើង។ ការសន្ទនានេះបានអនុញ្ញាតឲ្យយើងបង្កើតការយល់ដឹងកាន់តែស៊ីជម្រៅ អំពីផលប្រយោជន៍របស់យើងរៀងខ្លួន»។

លោកបានបន្តថា ប្រទេសអូស្ត្រាលី និងចិន មានសេដ្ឋកិច្ចបំពេញបន្ថែម និងផលប្រយោជន៍រួម ក្នុងការដោះស្រាយការប្រែប្រួលអាកាសធាតុ។ ជាមួយគ្នានេះ លោក Albanese បានបន្ថែមថា៖ «យើងក៏មានភាពខុសគ្នារបស់ពួកយើងផងដែរ។ នោះហើយជាមូលហេតុដែលការសន្ទនាដោយស្មោះត្រង់ មានសារៈសំខាន់។ សម្រាប់ប្រទេសអូស្ត្រាលី យើងតស៊ូមតិយ៉ាងខ្ជាប់ខ្ជួននូវសារៈសំខាន់នៃតំបន់ និងពិភពលោកដែលមានសន្តិភាព ស្ថិរភាព និងវិបុលភាព ដែលប្រទេសនានាគោរពអធិបតេយ្យភាព និងគោរពតាមច្បាប់អន្តរជាតិ»។

សម្រាប់លោក Li បន្ទាប់ពីកិច្ចប្រជុំ នាយករដ្ឋមន្ត្រីចិនរូបនេះ បានប្រាប់អ្នកសារព័ត៌មានថា ជំនួបនៃមេដឹកនាំទាំង២ នេះ ត្រូវបានធ្វើឡើង «ប្រកបដោយភាពស្មោះត្រង់ ប្រកបដោយភាពស៊ីជម្រៅ និងប្រកបដោយផ្លែផ្កា ហើយបានឈានដល់ការឯកភាពគ្នាលើបញ្ហាជាច្រើន»៕