អាមេរិក៖ លោកប្រធានាធិបតី Joe Biden បានព្រមានតាលីបង់កាលពីថ្ងៃចន្ទថា កុំជ្រៀតជ្រែកកិច្ចប្រឹងប្រែងជម្លៀសមនុស្សរបស់អាមេរិកចេញពីអាហ្វហ្គានីស្ថាន ដោយគំរាមពី “ការប្រើប្រាស់កម្លាំងដ៏មហន្តរាយបើចាំបាច់”។ លោក Biden បានចេញការព្រមានក្នុងអំឡុងពេលសុន្ទរកថាពីសេតវិមានអំពីព្រឹត្តិការណ៍ និងភាពវឹកវរដ៏ឆាប់រហ័សនៅអាហ្វហ្គានីស្ថាន បន្ទាប់ពីការដកកងទ័ពអាមេរិកចេញពីប្រទេសនោះ។
លោកបាននិយាយថា “នៅពេលយើងអនុវត្តការចាកចេញនេះ យើងបានបញ្ជាក់យ៉ាងច្បាស់ចំពោះពួកតាលីបង់ ប្រសិនបើពួកគេវាយប្រហារបុគ្គលិករបស់យើង ឬរំខានដល់ប្រតិបត្តិការរបស់យើង។ សហរដ្ឋអាមេរិកនឹងឆ្លើយតបវិញយ៉ាងឆាប់រហ័ស និងពោរពេញដោយកម្លាំង។ យើងនឹងការពារប្រជាជនរបស់យើង ដោយការប្រើប្រាស់កម្លាំងដ៏មហន្តរាយបើចាំបាច់។ ប្រធានាធិបតីរូបនេះបានការពារការសម្រេចចិត្តរបស់លោក ក្នុងការបញ្ចប់សង្គ្រាមអាមេរិកនៅអាហ្វហ្គានីស្ថានដោយទទូចថា បន្ទាប់ពី ២ទសវត្សរ៍វាលែងជាផលប្រយោជន៍សន្តិសុខជាតិរបស់អាមេរិកទៀតហើយ។
លោក Biden បាននិយាយថា លោកសុខចិត្តទទួលការរិះគន់ចំពោះការដួលរលំនៅអាហ្វហ្គានីស្ថាន ជាជាងបន្តសេចក្តីសម្រេចទៅប្រធានាធិបតីទី៥ របស់អាមេរិកទទួលខុសត្រូវបន្តទៀត ដោយអះអាងថា ការសម្រេចចិត្តចាកចេញពីអាហ្វហ្គានីស្ថានគឺជា “ត្រឹមត្រូវសម្រាប់អាមេរិក”៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
