រលកកម្ដៅដែលបានកើតមានពាសពេញប្រទេសក្រិក ក្នុងខែមិថុនា បានបន្តឲ្យមានចំនួនអ្នកស្លាប់កើនឡើងបន្តិចម្ដងៗ កាលពីចុងសប្តាហ៍ ដោយអាជ្ញាធរ កាលពីថ្ងៃអាទិត្យ (ទី១៦ ខែមិថុនា) បានរាយការណ៍ពីការស្លាប់របស់ជនជាតិអាមេរិកនៅលើកោះមួយរបស់ក្រិក។ ហើយមកទល់ពេលនេះ យ៉ាងហោចអ្នកទេសចរ ៥នាក់ នៅតែបាត់ខ្លួន នៅទូទាំងប្រទេសក្រិក។

គួរបញ្ជាក់ថា អាជ្ញាធរបាននិយាយថា សាកសពបុរសវ័យ ៥៥ឆ្នាំ មកពីទីក្រុងញូវយ៉ក ដែលបានបាត់ខ្លួនលើកោះ Mathraki នៅក្បែរកោះ Corfu ចាប់តាំងពីថ្ងៃទី១១ ខែមិថុនា ត្រូវបានរកឃើញនៅលើឆ្នេរមួយកាលពីថ្ងៃទី១៦ ខែមិថុនា។

ការប្រទះឃើញកើតមានឡើងបន្ទាប់ពីការរកឃើញសពបុរសម្នាក់នៅលើកោះ Samos កាលពី ១ថ្ងៃមុន។ ជាមួយគ្នានេះ អ្នកឡើងភ្នំជនជាតិហូឡង់ម្នាក់ បានបាត់ខ្លួននៅទីនោះរយៈពេល ១សប្តាហ៍ ប៉ុន្តែសពមិនទាន់ត្រូវបានកំណត់អត្តសញ្ញាណនៅឡើយទេ។ ប្រតិបត្តិការស្វែងរក ក៏កំពុងដំណើរការ ដើម្បីតាមរកភ្ញៀវទេសចរ ៥នាក់ផ្សេងទៀត ដែលបានបាត់ខ្លួននៅទូទាំងប្រទេសក្រិក ចំពេលសីតុណ្ហភាពឡើងក្ដៅកាន់តែខ្លាំង ក្នុងខែមិថុនានេះ។

អ្នកនាំពាក្យនគរបាល លោកស្រី Constantina Dimoglidou បាននិយាយថា៖ «បញ្ហាបាត់ខ្លួនអ្នកឡើងភ្នំមិនមែនជារឿងថ្មីនោះទេ។ យើងជួបប្រទះនូវបញ្ហានេះជារៀងរាល់ឆ្នាំ។ ប៉ុន្តែឆ្នាំនេះ វាហាក់ដូចជាមានមនុស្សកាន់តែច្រើនឡើងៗ ក្នុងអំឡុងពេលមានរលកកម្ដៅនេះ»។

ក្រិកបានជួបប្រទះរលកកម្ដៅបន្តបន្ទាប់គ្នាចំនួន២ ក្នុងរយៈពេល ២សប្តាហ៍កន្លងមកនេះ ដែលនាំមកនូវសីតុណ្ហភាពឡើងលើសពី ៣៨អង្សាសេដល់ផ្នែកជាច្រើននៃប្រទេស។ ទោះបីជាយ៉ាងណាក៏ដោយ ខណៈពេលដែលអាជ្ញាធរជាធម្មតាចេញការព្រមានដល់មនុស្សចាស់ និងអ្នកដែលមានបញ្ហាសុខភាពឲ្យស្នាក់នៅក្នុងផ្ទះ និងផ្តល់សំណើមដល់រាងកាយ នៅថ្ងៃក្ដៅខ្លាំង ក៏ការណែនាំនោះគ្រាន់តែជាការផ្ដល់ដំណឹង ជាជាងដាក់ចេញជាច្បាប់ ហើយមិនមានការរឹតបន្តឹងលើសកម្មភាពនានា ដូចជាការឡើងភ្នំនោះឡើយ៕