ប្រទេសថៃប្រឈមនឹងសប្តាហ៍ដ៏សំខាន់នៃសំណុំរឿង ដែលអាចបង្កឲ្យមានវិបត្តិនយោបាយ នៅក្នុងប្រទេសសេដ្ឋកិច្ចធំទី២ របស់អាស៊ីអាគ្នេយ៍មួយនេះ ដោយជោគវាសនារបស់នាយករដ្ឋមន្ត្រី និងគណបក្សប្រឆាំងដ៏ធំរបស់ប្រទេស កំពុងស្ថិតក្នុងភាពមិនច្បាស់លាស់។

សំណុំរឿងចំនួន៤ នៅចំពោះមុខតុលាការ នាថ្ងៃទី១៨ ខែមិថុនា ជាប់ពាក់ព័ន្ធនឹងអ្នកនយោបាយដ៏មានឥទ្ធិពលបំផុតរបស់ប្រទេសនេះ ដែលមានដូចជានាយករដ្ឋមន្រ្តី លោក សេដ្ឋា ថាវីស៊ីន អតីតមេដឹកនាំ លោក ថាក់ស៊ីន ស៊ីណាវ៉ាត់ គណបក្សប្រឆាំងដ៏មានប្រជាប្រិយ និងសមាជិកសភាជាន់ខ្ពស់។

គួរបញ្ជាក់ថា អស់រយៈពេលជាច្រើនទសវត្សរ៍មកហើយ នយោបាយរបស់ប្រទេសថៃ ត្រូវបានប៉ះពាល់ដោយការតស៊ូ រវាងស្ថាប័នរាជានិយម-អភិរក្សនិយមរបស់ប្រទេសនេះ ដែលគាំទ្រដោយពួកយោធា និងគណបក្សបណ្ដាប្រជានិយម ដូចជាគណបក្សដែលគាំទ្រដោយលោក ថាក់ស៊ីន និងគណបក្សប្រឆាំងបច្ចុប្បន្ននេះជាដើម។

អ្នកស្រាវជា្រវរបស់ស្ថាប័ន ANZ Research បានឲ្យដឹងនៅក្នុងកំណត់ត្រាមួយថា៖ «ករណីទាំងនេះបង្ហាញពីភាពផុយស្រួយ និងភាពស្មុគស្មាញនៃបរិយាកាសនយោបាយរបស់ប្រទេសថៃ។ នៅលើផ្នែកសេដ្ឋកិច្ច ការព្រួយបារម្ភភ្លាមៗ គឹជាសក្តានុពលនាំឲ្យមានការតវ៉ាដែលរំខាន និងពន្យារពេលដល់ការអនុវត្តគោលនយោបាយសារពើពន្ធ»។

សំណុំរឿងគួរឲ្យចាប់អារម្មណ៍ខ្លាំងចំនួន៣ គឺទី១ ករណីរបស់នាយករដ្ឋមន្ត្រី លោក សេដ្ឋា ត្រូវបានសមាជិកព្រឹទ្ធសភាអភិរក្សនិយមមួយក្រុម ចោទប្រកាន់ថា បានបំពានរដ្ឋធម្មនុញ្ញ នៅពេលដែលលោកតែងតាំងអតីតមេធាវីដែលមានកំណត់ត្រាផ្ដន្ទាទោស ប្រចាំខុទ្ទកាល័យរបស់លោក។ ករណីទី២ គឺទាក់ទងនឹងលោក ថាក់ស៊ីន ដែលត្រូវបានទម្លាក់ចេញពីអំណាចក្នុងរដ្ឋប្រហារយោធាឆ្នាំ ២០២៦ ត្រូវបានចោទប្រកាន់ពីបទប្រមាថព្រះមហាក្សត្រ និងបទចោទប្រកាន់ផ្សេងទៀត ពាក់ព័ន្ធនឹងបទសម្ភាសន៍ជាមួយប្រព័ន្ធផ្សព្វផ្សាយឆ្នាំ២០១៥។ ករណីទី៣ គឺជាការសម្រេច ដែលអាចឈានទៅដល់ការរំលាយគណបក្សបោះជំហានទៅមុខ (Move Forward) ដែលមានអាសនៈ ៣០ភាគរយនៅក្នុងសភាជាន់ទាប។ គណបក្សនេះរងបណ្តឹងរបស់គណៈកម្មាធិការរៀបចំការបោះឆ្នោត ដែលចោទប្រកាន់ថា បានបំពានរដ្ឋធម្មនុញ្ញ ដោយធ្វើយុទ្ធនាការបោះឆ្នោតទាមទារឲ្យធ្វើកំណែទម្រង់ច្បាប់ប្រមាថព្រះមហាក្សត្ររបស់ប្រទេស៕