ក្នុងរយៈពេល ៥ខែដំបូងនៃឆ្នាំនេះ នគរបាលសហព័ន្ធអាល្លឺម៉ង់ បានចុះឈ្មោះជនអន្តោប្រវេសន៍ចំនួន ២. ២១៥ នាក់ ដែលមកដល់ដោយមធ្យោបាយមិនទៀងទាត់ ដោយប្រើអ្វីដែលគេហៅថា«ផ្លូវបេឡារុស»។

ជនអន្តោប្រវេសន៍ ត្រូវបានគេចាប់បាននៅព្រំដែនអាល្លឺម៉ង់ជាមួយប៉ូឡូញ និងសាធារណរដ្ឋឆេក។ ចំនួនរបស់ពួកគេ បានកើនឡើងជាលំដាប់ ក្នុងរយៈពេលនៃឆ្នាំនេះ។ ខណៈពេលដែលមានការស្ទាក់ចាប់ត្រឹមតែ ២៦ដង ក្នុងខែមករា និង ២៥ដងក្នុងខែកុម្ភៈ តួលេខ បានកើនឡើងដល់ ៤១២នាក់ នៅក្នុងខែមីនា, ៨៦១នាក់ នៅក្នុងខែមេសា និង ៨៩១ នៅក្នុងខែឧសភា។

ប៉ុន្តែចំនួននេះ គឺនៅទាបជាងឆ្នាំមុនគួរឲ្យកត់សម្គាល់។ នៅចុងខែឧសភាឆ្នាំ ២០២៣ នគរបាល បានកត់ត្រាជនអន្តោប្រវេសន៍ប្រហែល ៦.000នាក់ ដែលគ្មានការអនុញ្ញាត ចូលតាមរយៈផ្លូវបេឡារុស។

ចាប់តាំងពីឆ្នាំ ២០២១ សហភាពអឺរ៉ុប បានចោទប្រកាន់ប្រទេសបេឡារុសថា មានចេតនាសម្របសម្រួលការធ្វើដំណើររបស់ជនអន្តោប្រវេសន៍ ពីបណ្តាប្រទេសដែលមានវិបត្តិ ជាពិសេសនៅមជ្ឈិមបូព៌ា ដោយផ្តល់ឲ្យពួកគេនូវទិដ្ឋាការ និងជំនួយផ្នែកដឹកជញ្ជូន។

បន្ទាប់ពីការទាក់ទាញជនអន្តោប្រវេសន៍ទៅប្រទេសបេឡារុស ពួកគេត្រូវបានបញ្ជូនបន្តទៅកាន់ប្រទេសសហភាពអឺរ៉ុប ដូចជាប្រទេសប៉ូឡូញ។ ទីក្រុងប្រ៊ុចសែល និយាយថា នេះគឺជាការប៉ុនប៉ង ដើម្បីធ្វើឲ្យ មានអស្ថិរភាពប្លុកប្រទេសចំនួន ២៧ ជាការសងសឹកចំពោះការដាក់ទណ្ឌកម្មរបស់សហភាពអឺរ៉ុបលើបេឡារុស ជុំវិញការបង្រ្កាបលើបាតុករគាំទ្រលទ្ធិប្រជាធិបតេយ្យ និងការពាក់ព័ន្ធរបស់ប្រទេសនេះ ក្នុងការឈ្លានពានរបស់រុស្ស៊ីលើអ៊ុយក្រែន។