មន្ត្រីអ៊ីស្រាអែល នៅថ្ងៃចន្ទ (ទី១៧ ខែមិថុនា) នេះ បាននិយាយថា នាយករដ្ឋមន្ត្រីអ៊ីស្រាអែល លោក Benjamin Netanyahu បានរំលាយគណៈរដ្ឋមន្ត្រីសង្គ្រាម ដែលមានសមាជិកចំនួន ៦រូប ដោយនេះជាការផ្លាស់ប្តូរមួយដែលត្រូវបានរំពឹងទុកយ៉ាងទូលំទូលាយថា នឹងកើតឡើង បន្ទាប់ពីមានការចាកចេញពីរដ្ឋាភិបាលរបស់អតីតឧត្តមសេនីយនិយមកណ្តាល លោក Benny Gantz។

ឥឡូវនេះ លោក Netanyahu ត្រូវបានគេរំពឹងថា នឹងធ្វើការពិគ្រោះយោបល់ អំពីសង្គ្រាម នៅតំបន់ហ្កាហ្សា ជាមួយរដ្ឋមន្ត្រីមួយចំនួនតូច ក្នុងនោះរួមទាំងរដ្ឋមន្ត្រីការពារជាតិ លោក Yoav Gallant និងរដ្ឋមន្ត្រីក្រសួងកិច្ចការយុទ្ធសាស្ត្រ លោក Ron Dermer ដែលធ្លាប់មាននៅក្នុងគណៈរដ្ឋមន្ត្រីសង្គ្រាមនេះដែរ។

លោកនាយករដ្ឋមន្ត្រីបានប្រឈមនឹងការទាមទារពីដៃគូសាសនា-ជាតិនិយម នៅក្នុងរដ្ឋាភិបាលចម្រុះរបស់លោក គឺរដ្ឋមន្ត្រីហិរញ្ញវត្ថុលោក Bezalel Smotrich និងរដ្ឋមន្ត្រីសន្តិសុខជាតិ លោក Itamar Ben-Gvir ឲ្យបញ្ចូលក្នុងគណៈរដ្ឋមន្ត្រីសង្គ្រាម ជាវិធានការមួយដែលនឹងធ្វើឲ្យមានភាពតានតឹងកាន់តែខ្លាំងឡើងៗ ជាមួយដៃគូអន្តរជាតិ ក្នុងនោះរួមទាំងសហរដ្ឋអាមេរិកផងដែរ។

វេទិកានេះត្រូវបានបង្កើតឡើងបន្ទាប់ពីលោក Gantz បានចូលរួមជាមួយលោក Netanyahu នៅក្នុងរដ្ឋាភិបាលបង្រួបបង្រួមជាតិ នៅពេលសង្រ្គាមចាប់ផ្ដើមក្នុងខែតុលា ហើយថែមទាំងរួមបញ្ចូលដៃគូរបស់លោក Gantz គឺលោក Gadi Eisenkot និងលោក Aryeh Deri ដែលប្រធានគណបក្សជំនឿសាសនា Shas ជាអ្នកសង្កេតការណ៍។

លោក Gantz និងលោក Eisenkot ទាំង ២នាក់ បានចាកចេញពីរដ្ឋាភិបាលកាលពីសប្តាហ៍មុន ជុំវិញអ្វីដែលពួកគេបាននិយាយថា គឺជាការបរាជ័យរបស់លោក Netanyahu ក្នុងការបង្កើតយុទ្ធសាស្រ្ត សម្រាប់សង្រ្គាមនៅតំបន់ហ្កាហ្សា៕