វិមានក្រឹមឡាំង បាននិយាយនៅថ្ងៃចន្ទនេះថា សន្និសីទដែលរៀបចំដោយប្រទេសស្វ៊ីសស្តីពីសង្គ្រាមអ៊ុយក្រែន បានផ្តល់លទ្ធផលមិនច្បាស់លាស់ និងបង្ហាញពីភាពឥតប្រយោជន៍នៃការរៀបចំកិច្ចចរចា ដោយគ្មានរុស្ស៊ីចូលរួម។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា លទ្ធផលនៃកិច្ចប្រជុំ គឺ «ជិតឈានដល់ចំណុចសូន្យ»។

លោក Peskov បាននិយាយថា ប្រទេសរុស្ស៊ី នៅតែបើកចំហសម្រាប់ការសន្ទនាជាមួយប្រទេសទាំងអស់ដែលមានបំណងដឹកនាំការចរចា ហើយនឹងបន្តបង្ហាញពីជំហររបស់ខ្លួន ទៅកាន់ប្រទេសទាំងអស់នេះ។

លោកប្រធានាធិបតី វ្ល៉ាឌីមៀ ពូទីន បាននិយាយកាលពីសប្តាហ៍មុនថា រុស្ស៊ីមានឆន្ទៈក្នុងការបញ្ចប់សង្រ្គាម ប៉ុន្តែលោក បានកំណត់លក្ខខណ្ឌសម្រាប់អ៊ុយក្រែន គឺការលះបង់មហិច្ឆិតាចូលជាសមាជិករបស់អង្គការណាតូ និងការដកកងទ័ពចេញពីតំបន់ចំនួន៤ ដែលរុស្ស៊ីបានទាមទារ ដោយទីក្រុងគីវ បានចាត់ទុកថា ស្មើនឹងការចុះចាញ់ទាំងស្រុង។

នៅឯកិច្ចប្រជុំកំពូលកាលពីចុងសប្តាហ៍ នៅប្រទេសស្វ៊ីស ប្រទេសមហាអំណាចលោកខាងលិច និងសម្ព័ន្ធមិត្តរបស់ពួកគេ បានរិះគន់ការឈ្លានពានរបស់រុស្ស៊ីលើអ៊ុយក្រែន ប៉ុន្តែមិនបានសម្រេចក្នុងការបញ្ចុះបញ្ចូលរដ្ឋមិនចូលបក្សសម្ព័ន្ធធំៗ ឲ្យចូលរួមក្នុងសេចក្តីថ្លែងការណ៍ចុងក្រោយរបស់ពួកគេ ហើយគ្មានប្រទេសណាមួយ ចេញមុខធ្វើជាម្ចាស់ផ្ទះវគ្គបន្តនោះទេ។