អ្នកភូមិរស់នៅក្នុងស្រុក Nashik ស្ថិតនៅភាគខាងលិចប្រទេសឥណ្ឌា បានប្រមូលផ្តុំគ្នានៅមាត់អណ្តូងរីងទឹក ពេលដែលពួកគេប្រឈមនឹងវិបត្តិទឹកប្រើប្រាស់ធ្ងន់ធ្ងរ បង្កឡើងដោយសារកង្វះខាតទឹកភ្លៀងនៅក្នុងតំបន់ ។

អ្នកភូមិម្នាក់ និយាយថា ពួកគេប្រឈមហានិភ័យជីវិតរស់នៅរបស់ពួកគេស្ទើតែរាល់ថ្ងៃ ហើយគ្រោះរាំងស្ងួតរយៈពេលយូរ បានធ្វើឲ្យអ្នកស្រុកពិបាកឈានដល់តម្រូវការទឹកប្រើប្រាស់ ស្របពេលដែលរលកកម្តៅកាន់តែកើនឡើង ។

ស្រុកភាគខាងលិច Nashik ស្ថិតនៅក្នុងចំណោមតំបន់រងផលប៉ះពាល់ធ្ងនធ្ងរបំផុតដោយសាររលកកម្តៅ ដែលវិបត្តិមួយនេះ កាន់តែអាក្រក់ខ្លាំង ដោយសារតែវិបត្តិទឹកធ្ងន់ធ្ងរ ។

ដោយឡែក ប្រជាពលរដ្ឋរស់នៅរដ្ឋភាគខាងជើង Uttar Pradesh និងដែនដីសហព័ន្ធ Chandigarh បានប្រឈមនឹងរលកកម្តៅធ្ងន់ធ្ងរ និងអាកាសធាតុក្តៅស្ងួតផងដែរ ។

ប្រជាពលរដ្ឋត្រូវបានគេមើលឃើញដើរដោយយកក្រមារុំមុខ និងទទួលទានភេសជ្ជៈត្រជាក់ ដើម្បីទប់ទល់នឹងរលកកម្តៅដ៏អាក្រក់នេះ ។

ក្រុមអ្នកវិទ្យាសាស្រ្ត និយាយថា អាស៊ីប្រឈមនឹងរលកកម្តៅក្តៅខ្លាំងអំឡុងរដូវក្តៅឆ្នាំនេះ ដែលវាកាន់តែធ្ងន់ធ្ងរជាងមុន ដោយសារបម្រែបម្រួលអាកាសធាតុបង្កឡើងដោយមនុស្ស ៕