មហាសេដ្ឋីសញ្ជាតិ២ រុស្ស៊ី-អ៊ូសបេគីស្ថាន លោក Alisher Usmanov បានដាក់ពាក្យបណ្តឹងប្រឆាំងនឹងធនាគារ UBS Europe SE នៅទីក្រុង Frankfurt ប្រទេសអាល្លឺម៉ង់ ជុំវិញអ្វីដែលមេធាវីរបស់លោក បាននិយាយថា ជារបាយការណ៍មិនបានបញ្ជាក់អំពីប្រតិបត្តិការដែលបង្កឲ្យមានការស៊ើបអង្កេតលើកូនក្ដីរបស់ខ្លួន។

ធនាគារ UBS បានបដិសេធមិនធ្វើអត្ថាធិប្បាយអ្វីឡើយ។ លោក Peter Gauweiler មេធាវីតំណាងឲ្យលោក Usmanov បាននិយាយនៅក្នុងសេចក្តីថ្លែងការណ៍មួយនៅថ្ងៃចន្ទ (ទី១៧ ខែមិថុនា) នេះថា៖ «យើងបានដាក់ពាក្យប្តឹង UBS Europe SE នៅទីក្រុង Frankfurt តាំងនាមឲ្យលោក Usmanov ផ្ទាល់ ដើម្បីឲ្យតុលាការបង្កើតអង្គហេតុជាមូលដ្ឋាន និងការទទួលខុសត្រូវរបស់ធនាគារ ចំពោះការខូចខាត»។

ជាមួយគ្នានេះ ក្រុមមេធាវីរបស់លោក Usmanov បានប្រាប់បន្ថែមទៀតថា សកម្មភាពរបស់ធនាគារ UBS បាននាំឲ្យមានការខាតបង់ផ្នែកហិរញ្ញវត្ថុ និង «ការខូចខាតយ៉ាងធ្ងន់ធ្ងរ» ដល់កេរ្តិ៍ឈ្មោះកូនក្តីរបស់ពួកគេ៕