ឯកឧត្តមបណ្ឌិត ម៉ឹង មករា បានចូលរួមជាអធិបតីក្នុងពិធីសំណេះសំណាល និងពិនិត្យព្យាបាលជម្ងឺ ជូនមន្ត្រីរដ្ឋបាលស្រុកមេមត់ ជាង ៨០០នាក់ ក្រោមការ​ឧបត្ថម្ភ​ដ៏ខ្ពង់ខ្ពស់​សម្តេចមហាបវរធិបតី ហ៊ុន ម៉ាណែត ​នាយករដ្ឋមន្ដ្រីនៃកម្ពុជា ​និងលោកជំទាវបណ្ឌិត ពេជ ចន្ទមុន្នី។

ឯកឧត្តមបណ្ឌិត ម៉ឹង មករា រដ្ឋលេខាធិការ ក្រសួងសេដ្ឋកិច្ច និងហិរញ្ញវ និងជាប្រធានក្រុមការងារ​រាជ​រដ្ឋាភិបាលចុះមូលដ្ឋាន ស្រុកមេមត់ ខេត្តត្បូងឃ្មុំ បានចូលរួមជាអធិបតីក្នុងពិធី​សំណេះ​សំណាល និងពិនិត្យព្យាបាលជម្ងឺ ជូនថ្នាក់ដឹកនាំ និងមន្ត្រីរដ្ឋបាលស្រុកមេមត់ ខេត្តត្បូងឃ្មុំ នៅវិទ្យាល័យ ប៊ុន រ៉ានី ហ៊ុន សែន មេមត់ កាលពីថ្ងៃទី១៧ ខែមិថុនា ឆ្នាំ២០២៤។

ក្នុងពិធីសំណេះសំណាលឯកឧត្តមបណ្ឌិត ម៉ឹង មករា បានបញ្ជាក់ថា ការពិនិត្យសុខភាព និងព្យាបាលជម្ងឺ ជូនថ្នាក់ដឹកនាំនិងមន្ត្រីរដ្ឋបាលស្រុកមេមត់ទាំងអស់នាថ្ងៃនេះ ជា​កម្មវិធីដែលមានសារះសំខាន់បំផុតក្នុងការទ្រទ្រង់សុខមាលភាពរបស់ ថ្នាក់ដឹកនាំ និងមន្ត្រីគ្រប់ៗរូប ឱ្យយល់ដឹងអំពីការថែទាំសុខភាព ដែលនាំមកនូវសុខភាពល្អ ដើម្បីធានាឲ្យបាននូវ ការបង្កើន​ផលិតភាពការងារ កាត់បន្ថយការចំណាយលើការថែទាំសុខភាព ​បង្កើនសុខុមាលភាពផ្លូវចិត្ត និងលើកកម្ពស់ការចូលរួមក្នុងការងារសង្គមសេដ្ឋកិច្ច។

ឯកឧត្តមបណ្ឌិត បានបន្តថ្លែងថា "ការកសាងមូលធនមនុស្ស" ទាមទារឲ្យមនុស្សទាំងអស់​មាន​សុខភាព​ល្អជាចំបង។ ដូចនេះការថែទាំសុខភាព ជាមូលដ្ឋានគ្រឹះសំខាន់បំផុតក្នុងការ​សម្រេច​បាននូវគោលបំណងទាំងឡាយរបស់រាជរដ្ឋាភិបាល ​ពិសេសការ ដើម្បីចូលរួមជម្រុញការ​អនុវត្ត​នូវកម្មវិធីនយោបាយ និងយុទ្ធសាស្ត្រ របស់រាជរដ្ឋាភិបាល ប្រកបដោយប្រសិទ្ធិភាព និងចីរភាព។

ឯកឧត្តមបណ្ឌិត​ បានបន្តថ្លែងថា​ បេសកកម្មចម្បងរបស់ក្រុមការងារថ្នាក់ជាតិ​ចុះមូលដ្ឋាន​ស្រុក​មេមត់ ​គឺការរួមចំណែក​ជាមួយរាជរដ្ឋាភិបាលកម្ពុជា ​ផ្សព្វផ្សាយនិងអនុវត្តនូវគោលនយោបាយ​សំខាន់ៗនៃកម្មវិធីនយោបាយ "យុទ្ធសាស្ត្របញ្ចកោណ-ដំណាក់កាលទី១" ដែលជាកម្មវិធី​នយោបាយ​របស់ រាជរដ្ឋាភិបាលអាណត្តិទី៧ សម្រាប់ការកសាង ​និងការពារជាតិមាតុភូមិកម្ពុជា។

ការ​ខិតខំប្រឹងប្រែងរបស់រាជរដ្ឋាភិបាលកម្ពុជាបញ្ជាក់ឲ្យឃើញថា​ ថ្នាក់ដឹកនាំរាជរដ្ឋាភិបាល តែងតែ​យកចិត្តទុកដាក់ជាប់ជាប្រចាំ ដោះស្រាយនូវទុក្ខលំបាករបស់ប្រជាពលរដ្ឋ ​ការពារ និងបម្រើ​ប្រជាពលរដ្ឋ គ្រប់កាលៈទេសៈ ដើម្បីធានាឲ្យបាននូវ ​សុខសន្តិភាព ​និងការអភិវឌ្ឍលើគ្រប់វិស័យ ជូនប្រជាជាតិ និងមាតុភូមិកម្ពុជា៕អត្ថបទ៖ កុម្ភៈ