ប្រធានទីភ្នាក់ងារ UNRWA លោក ហ្វីលីព ឡាហ្សារីនី(Philippe Lazzarini) បាននិយាយទៅកាន់អ្នកសាព័ត៌មាននៅទីក្រុង Oslo ប្រទេសន័រវ៉េស កាលពីថ្ងៃចន្ទថា អរិភាព នៅតែបន្តនៅក្នុងទីក្រុងរ៉ាហ្វា និងនៅភាគខាងត្បូងតំបន់ហ្កាហ្សា ទោះបីជាមានការប្រកាសរបស់យោធាអ៊ីស្រាអែល កាលពីថ្ងៃអាទិត្យ ទី១៦ ខែមិថុនា អំពីការផ្អាកប្រយុទ្ធជាយុទ្ធសាស្ត្រ ក្នុងប្រតិបត្តិការដើម្បីអនុញ្ញាតឱ្យមានជំនួយមនុស្សធម៌ ចូលទៅក្នុងតំបន់ទាំងនោះ ក៏ដោយ។

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអាទិត្យ បានរិះគន់ផែនការ ដែលត្រូវបានប្រកាសដោយយោធា ដើម្បីផ្អាកការប្រយុទ្ធរាល់ថ្ងៃ នៅតាមផ្លូវធំមួយក្នុងចំណោមផ្លូវធំជាច្រើន ចូលទៅក្នុងតំបន់ហ៊ុមព័ទ្ធប៉ាឡេស្ទីន។

លោក Lazzarini អគ្គស្នងការនៃទីភ្នាក់ងារ UNRWA ដែលជាទីភ្នាក់ងារធំមួយ ផ្តល់ជំនួយមនុស្សធម៌ដល់តំបន់ហ្កាហ្សា បាននិយាយថា ពុំមានការផ្អាកការប្រយុទ្ធគ្នានោះទេ។

លោក Lazzarini បាននិយាយក្នុងសន្និសីទសារព័ត៌មានថា មានព័ត៌មានពីការសម្រេចចិត្តនៃការផ្អាកប្រយុទ្ធត្រូវបានធ្វើឡើង ប៉ុន្តែកម្រិតនយោបាយនិយាយថា គ្មានការសម្រេចចិត្តណាមួយត្រូវបានធ្វើឡើងឡើយ។

ដូច្នេះសម្រាប់ពេលនេះ លោកអាចនិយាយបានថា អរិភាពនៅតែបន្តនៅក្នុងតីក្រុងរ៉ាហ្វា(Rafah) និងនៅភាគខាងត្បូងតំបន់ហ្កាហ្សា ហើយប្រតិបត្តិការនោះ គ្មានអ្វីផ្លាស់ប្តូរនៅឡើយទេ។

យោធាអ៊ីស្រាអែល បាននិយាយកាលពីថ្ងៃចន្ទថា កងកម្លាំងរបស់ខ្លួន កំពុងបន្តផ្តោតលើប្រតិបត្តិការដែលផ្អែកលើការស៊ើបការសម្ងាត់នៅក្នុងតំបន់ Rafah រួមមានការប្រយុទ្ធគ្នាយ៉ាងកៀកជាមួយក្រុមសកម្មប្រយុទ្ធ ហើយបាន រឹបអូស និងបំផ្លាញអាវុធជាច្រើនរបស់ក្រុមនេះ។