លោកឧកញ៉ា សៅ សេងហាក់ ប្រធានសហព័ន្ធខ្មែរកីឡាហាប់គីដូ បានប្ដេជ្ញាចិត្តលើចំណុច ៤សំខាន់ៗ ដើម្បី​ជំរុញ​ការ​អភិវឌ្ឍវិស័យកីឡាហាប់គីដូនេះឲ្យកាន់តែរីកចម្រើន ទាំងក្នុងក្របខណ្ឌថ្នាក់ជាតិ និងអន្ដរជាតិ ។

ការប្ដេជ្ញាចិត្តនេះ ស្របពេលលោកឧកញ៉ា ត្រូវបានសមាជិកគណៈកម្មាធិការប្រតិបត្តិសហព័ន្ធ បោះឆ្នោត​គាំទ្រ​ធ្វើ​ជា​ប្រធាន​សហព័ន្ធអាណត្តិថ្មីបន្ដទៀត ក្នុងមហាសន្និបាតបញ្ចប់អាណត្តិទី៧ បន្ដអាណត្ដិទី៨ ឆ្នាំ២០២៤-២០២៨ កាល​ពី​ចុង​សប្ដាហ៍កន្លងទៅ នៅទីស្នាក់ការគណៈកម្មាធិការជាតិអូឡាំពិកកម្ពុជា ។

គោលដៅសំខាន់ៗ ដែលប្រធានសហព័ន្ធអាណត្តិថ្មី បានប្ដេជ្ញាបន្ដយកចិត្តទុកដាក់ និងជំរុញការអភិវឌ្ឍ សម្រាប់​រយៈពេល ៤ឆ្នាំបន្ទាប់នេះ រួមមាន៖

១-ការប្ដេជ្ញាចិត្តរៀបចំការប្រកួតជ្រើសរើសជើងថ្នាក់ជាតិឲ្យបានរៀងរាល់ឆ្នាំ ដើម្បី​ជំរុញ​ការ​អភិវឌ្ឍ​វិស័យ​កីឡា​ហាប់គីដូ​នេះឲ្យកាន់តែមានភាពរីកចម្រើនក្នុងថ្នាក់ជាតិ និងអន្តរជាតិ។

២- ការប្តេជ្ញាចិត្តបន្តជំរុញ ទាំងការងាររដ្ឋបាល ការបណ្តុះបណ្តាល និងផលិតនូវធនធានមនុស្ស​ឲ្យ​កាន់តែ​រីក​ចម្រើន​ជា​លំ​ដាប់ សម្រាប់ត្រៀមចូលរួមការប្រកួតថ្នាក់ជាតិ និងអន្តរជាតិ ស្របតាមគោលការណ៍សហព័ន្ធជាសកល។

៣-សហព័ន្ធត្រៀមបញ្ជូនក្រុមកីឡាករ-កីឡាការិនី ចូលរួមការប្រកួតកីឡាហាប់គីដូជ្រើសរើសជើងឯកពិភពលោក (World LH.F Hapkido Championship 2024) នៅប្រទេសថៃ ចាប់ពីថ្ងៃទី១ ដល់ថ្ងៃទី៤ ខែសីហា ឆ្នាំ២០២៤ ខាងមុខ។

៤-សហព័ន្ធនឹងពង្រីកវិសាលភាពឲ្យទៅដល់បណ្តាខេត្ត និងចាប់យកឱកាសចេញទៅចូលរួមប្រកួត នៅក្រៅ​ប្រទេស​ឲ្យ​បាន​ច្រើនតាមដែលលទ្ធភាពដែលសហព័ន្ធអាចធ្វើទៅបាន ដើម្បីបង្កើតស្នាដៃ និងលើកិត្យា​នុភាព​ហាប់​គីដូ​កម្ពុជា​ឲ្យ​កាន់​តែល្បីល្បាញទាំងក្នុងប្រទេស និងលើឆាកអន្តរជាតិ។

លោក គង់ ចាន់ធីណា អគ្គលេខាធិការសហព័ន្ធ បានគូសបញ្ជាក់ក្នុងរបាយការណ៍ថា សម្រាប់អាណត្តិ​ចាស់ៗ​កន្លង​មក ថ្នាក់ដឹកនាំសហព័ន្ធគ្រប់ជំនាន់ បានយកចិត្តទុកដាក់ខ្ពស់ លើការងារបច្ចេកទេស និងការងាររដ្ឋបាល ដែល​ធ្វើ​ឲ្យ​សហព័ន្ធ​មានការរីកចម្រើនគួរឲ្យកត់សម្គាល់ ពិសេសក្នុងអាណត្តិទី៧ កន្លងទៅ ក្រៅពីជំរុញឲ្យ​មាន​ការ​ប្រកួត​ជើង​ឯក​ថ្នាក់​ជាតិ សហព័ន្ធក៏សម្រេចបាននូវសមិទ្ធផលជាច្រើនផងដែរ ។

លោក ទុយ ប៊ុនហឿន អនុប្រធាននាយកដ្ឋានអប់រំកាយ និងកីឡា បានកោតសរសើរ និងវាយតម្លៃខ្ពស់ ចំពោះ​ការ​ខិតខំ​អភិវឌ្ឍរបស់សហព័ន្ធខ្មែរកីឡាហាប់គីដូនាពេលកន្លងមក។ លោកថា បច្ចុប្បន្ន សហព័ន្ធ​កីឡា​ជាតិ​សរុប​មាន​ចំនួន ៦០ ក្នុងនោះមានសហព័ន្ធកីឡាជាតិចំនួន៤៨ ដែលទទួលបានកញ្ចប់ថវិកាគាំទ្រប្រចាំឆ្នាំពីក្រសួងអប់រំ យុវជន និងកីឡា ដើម្បីដំណើរការអភិវឌ្ឍ។

ដោយឡែកសម្រាប់ប្រភេទកីឡាហាប់គីដូ នៅមិនទាន់ទទួលបានកញ្ចប់ថវិកាអភិវឌ្ឍន៍ប្រចាំឆ្នាំនៅឡើយទេ ។ ដូច្នេះ​ក្នុងអាណត្តិបន្តនេះ លោកក៏បានលើកទឹកចិត្តឲ្យសហព័ន្ធខ្មែរកីឡាហាប់គីដូស្នើសុំកញ្ចប់ថវិកាគាំទ្រពីក្រសួងអប់រំ យុវជន និងកីឡា ហើយក្រសួងនឹងធ្វើការពិនិត្យពិចារណា ដើម្បីស្នើសុំបន្ដទៅក្រសួងសេដ្ឋកិច្ច និងហិរញ្ញវត្ថុ សម្រាប់​យក​មកបម្រើឲ្យការងារបណ្ដុះបណ្ដាល និងជំរុញការអភិវឌ្ឍកាន់តែរីកចម្រើនថែមទៀត ។

គួរដឹងថា សម្រាប់សមាសភាពថ្នាក់ដឹកនាំសហព័ន្ធកីឡាហាប់គីដូកម្ពុជា អាណត្តិទី៨ ក្រៅពីលោក សៅ សេងហាក់ ជាប្រធាន គឺមានឯកឧត្តម ជា បូរ៉ា, លោក ផាត់ សុភា, លោក គួច ហុងជៀក, លោក ទេព វីរៈ និងលោក សែ តារា ជាអនុប្រធាន ព្រមទាំងលោក គង់ ចាន់ធីណា ដែលបន្ដកាន់តំណែងសំខាន់ជាអគ្គលេខាធិការ រួមជា​មួយ​អគ្គ​លេខា​ធិការរង អគ្គហេរញ្ញិក  អគ្គហេរញ្ញិករង និងសមាជិក ៨រូបផ្សេងទៀត ៕ អត្ថបទ លី ឈុនឡា