កោះកុង៖ លោកជំទាវ មិថុនា ភូថង អភិបាលខេត្តកោះកុង បាន​ប្រាប់​ដល់​ក្រុម​ប្រឹក្សា​ស្រុក​មណ្ឌល​សីមា ត្រូវបំពេញកាតព្វកិច្ចទៅប្រកាសទ្រព្យសម្បត្តិ និងបំណុល​នៅ​អង្គភាព​ប្រឆាំង​អំពើ​ពុក​រលួយ​ឱ្យបានទាន់ពេលវេលា។

ក្នុងពិធីប្រកាសតែងតាំងក្រុមប្រឹក្សាស្រុកមណ្ឌលសីមាចំនួន១១នាក់ លោកជំទាវ​អភិបាល​ខេត្ត​កោះកុង ថ្លែងនៅថ្ងៃទី១៨ ខែមិថុនាឆ្នាំ២០២៤ថា សមាជិកក្រុមប្រឹក្សាគ្រប់រូប អាណត្តិទី៤នេះ ត្រូវ​មានភាពជាម្ចាស់ការអនុវត្តការងារទៅប្រកាសទ្រព្យសម្បត្តិឱ្យបានត្រឹមត្រូវតាមច្បាប់កំណត់។ ចំពោះសមាជិកក្រុមប្រឹក្សាស្រុកមណ្ឌលសីមា អាណត្តិទី៣ ដែលទើប​ជាប់ឆ្នោត​ជា​សមាជិក​ក្រុម​ប្រឹក្សា​ឡើង​វិញ​ទៅប្រកាសទ្រព្យសម្បត្តិដូចគ្នាដែរ។

លោកជំទាវ មិថុនា ភូថង បញ្ជាក់ដែរថា ការប្រកាសទ្រព្យ​សម្បត្តិ និង​បំណុល​របស់​ខ្លួន​សមាជិក​ក្រុមប្រឹក្សា ចាំបាច់បញ្ចូនទៅអង្គភាពប្រឆាំងអំពើពុករលួយក្នុងរយៈពេល៣០ថ្ងៃយ៉ាងយូរ បន្ទាប់​ពី​ថ្ងៃ​ប្រកាសចូលកាន់តំណែងនេះ។ ការប្រកាសនេះ សាមីខ្លួន​ត្រូវ​អនុវត្ត​តាម​របប​ប្រកាស​២​ឆ្នាំ​ម្តង​ ស្របតាមគោលការណ៍កំណត់ច្បាប់។

បន្ថែមលើនេះ លោកជំទាវមិថុនា ភូថង ក៏ជំរុញឱ្យក្រុមប្រឹក្សាស្រុកមណ្ឌលសីមា អាណត្តិទី៤ ត្រូវ​ផ្តល់​សេវា​សាធារណៈ និងដោះស្រាយ​បញ្ហា​ប្រឈម​នានាជូ​ន​ប្រជាពលរដ្ឋ​មាន​ប្រសិទ្ធភាព និង​គុណភាព​ខ្ពស់​តាមគោលនយោបាយរបស់រាជរដ្ឋាភិបាលកម្ពុជាដែលបានដាក់ចេញអនុវត្ត។

រដ្ឋបាលថ្នាក់ក្រោមជាតិ គ្រប់ថ្នាក់ចាំបាច់បន្តលើកកម្ពស់សេវារដ្ឋបាលឱ្យកាន់តែឆាប់រហ័ស តម្លាភាព និងងាយស្រួលតាមបែបបទ និងនីតិវិធីកំណត់។ ពិសេសទៀតនោះ គឺគ្រប់មន្រ្តីរដ្ឋបាល និង​ក្រុមប្រឹក្សាស្រុកមណ្ឌលសីមា ពង្រឹងក្រមសិលធម៌វិជ្ជាជីវៈ ការទទួលខុសត្រូវ និង​ភាព​ស្អាតស្អំ​ដោយ​ឈរ​លើវិធានការយ៉ាងម៉ឺងម៉ាត់​ក្នុងការដាក់ទណ្ឌកម្ម​ចំពោះមន្រ្តីណាដែ​ល​ប្រព្រឹត្ត​បំពាន​សីលធម៌​វិជ្ជាជីវៈ និងរំលោភអំណាចក្នុងការអនុវត្តតួនាទី ភារកិច្ចរបស់ខ្លួន ក្នុងនាមជាអ្នក​បម្រើ​សេវា​សា​ធារណជូនប្រជាពលរដ្ឋ៕ អត្តបទៈឈឹម មករា