ក្រុមកីឡាវាយកូនបាល់ជម្រើសជាតិកម្ពុជា បានធ្វើការបោះជំរំហ្វឹកហាត់រយៈពេលខ្លី នៅទឹកដី​ខេត្តសៀមរាប មុនបន្ដចេញទៅប្រកួតលក្ខណៈអន្ដរជាតិមួយ នៅប្រទេសថៃ ដើម្បីពង្រឹង​សមត្ថភាព​ត្រៀមចូលរួមការប្រកួតកីឡាវាយកូនបាល់អន្ដរជាតិ Davis Cup Asia/Oceania Group IV ឆ្នាំ២០២៤ ដែលកម្ពុជាទទួលបានសិទ្ធធ្វើម្ចាស់ផ្ទះជាលើកដំបូង នាខែកក្កដាខាងមុខ ។

លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា បានឲ្យដឹងថា ការ​បោះជំរំ​ហ្វឹកហាត់​នេះ មានរយៈពេលត្រឹម ៣ថ្ងៃ ៤យប់ប៉ុណ្ណោះ ហើយការ​សម្រេច​ជ្រើសរើស​ខេត្ត​សៀមរាប​​នេះ ព្រោះជាកន្លែង​ដែល​ស័ក្ដិសម​ជួយ​ឲ្យការហ្វឹកហាត់​របស់​កីឡាករ​កាន់​តែ​មាន​ប្រសិទ្ធភាព និងបង្កើនការយល់ចិត្តគ្នាកាន់តែច្បាស់ មុនប្រកៀកស្មាគ្នាប្រយុទ្ធលើទីលាន ដើម្បី​ស្វែង​រក​ជ័យ​ជម្នះជូនជាតិនាខែក្រោយ ។

លោកបន្ដថា បន្ទាប់ពីបោះជំរុំហ្វឹកហាត់នៅខេត្តសៀបរាប ក្រុមជម្រើសជាតិ​កីឡា​វាយ​កូន​បាល់​កម្ពុជា​ នឹងបន្ដដំណើរទៅចូលរួមការប្រកួតលក្ខណៈអន្ដរជាតិមួយ នៅប្រទេសថៃ មុនត្រ​ឡប់​មក​កម្ពុជា​វិញ ដោយនឹងបន្ដស្នាក់នៅ និងប្រមូលផ្ដុំ​ហ្វឹកហាត់​នៅ​សណ្ឋាគារ​មួយ​ក្បែរ​ពហុកីឡដ្ឋាន​ជាតិ​មរតកតេជោ សម្រាប់ត្រៀមរហូតដល់ការប្រកួតផ្លូវការ នៃព្រឹត្តិការណ៍ Davis Cup លើក​ដំបូង​នៅ​កម្ពុជាតែម្ដង ។

គួរដឹងថា ការប្រកួតកីឡាវាយកូនបាល់អន្ដរជាតិ Davis Cup Asia/Oceania Group IV ឆ្នាំ​២០២៤​ លើកដំបូងនៅកម្ពុជានេះ នឹងប្រព្រឹត្តទៅ ចាប់ពីថ្ងៃទី០៩ ដល់ថ្ងៃទី១៣ ខែ​កក្កដា​ខាង​មុខ នៅទីលានវាយកូនបាល់ នៃពហុកីឡដ្ឋានជាតិមរតកតេជោ ដោយមានអត្តពលិកមកពី ៨​ប្រទេស​ចូលរួម រួមមានម្ចាស់ផ្ទះកម្ពុជា, គុយវ៉ែត, កៀហ្ស៊ីស៊ីស្ថាន, អ៊ីរ៉ាក់ មីយ៉ាន់ម៉ា, ស្រីលង្កា, កាតា និងប្រទេសអារ៉ាប់រួម ។

សម្រាប់ម្ចាស់ផ្ទះកម្ពុជា បានត្រៀមកីឡាករ ៥រូប ដើម្បីចូលរួមប្រកួតប្រជែងដណ្ដើមកៅអី Group III វិញ ក្រៅ ប៊ុន កេន្នី, ទេព ទីម៉ូធី, ឡេង សារិនរាជ, ផានថាឡា ឡូកាស អាតថូ និងកីឡាករ ឃ្លាំងពន្លក៕ អត្ថបទ លី ឈុនឡា