លោក វ្ល៉ាឌីមៀរ ពូទីន (Vladimir Putin) បានសន្យាថា នឹងបង្កើតប្រព័ន្ធពាណិជ្ជកម្ម និងសន្តិសុខជាមួយកូរ៉េខាងជើង ដែលគេចឲ្យផុតពីឥទ្ធិពលរបស់លោកខាងលិច ហើយបានសន្យាថា នឹងផ្ដល់ការគាំទ្រដោយឥតងាករេ ដោយការលើកឡើងនេះមាននៅក្នុងលិខិតមួយដែលត្រូវបានចេញផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង នាថ្ងៃអង្គារ (ទី១៨ ខែមិថុនា) នេះ ពោលគឺនៅមុនដំណើរទស្សនកិច្ចដែលបានគ្រោងទុកទៅកាន់ប្រទេសនេះ។

នៅក្នុងលិខិតដែលត្រូវបានចេញផ្សាយដោយសារព័ត៌មាន Rodong Sinmun របស់កូរ៉េខាងជើង ជាទីភ្នាក់ងារតំណាងឲ្យគណបក្សពលករដែលកំពុងកាន់អំណាច ប្រធានាធិបតីរុស្ស៊ីបានលើកឡើងថា ប្រទេសទាំង២ បានបង្កើតទំនាក់ទំនង និងភាពជាដៃគូយ៉ាងល្អ ក្នុងរយៈពេល ៧០ឆ្នាំកន្លងមកនេះ ដោយផ្អែកលើសមភាព ការគោរពគ្នាទៅវិញទៅមក និងការមានទំនុកចិត្តលើគ្នា។

ក្នុងលិខិតនោះ លោក ពូទីន បានសរសេរថា៖ «យើងនឹងអភិវឌ្ឍយន្តការជម្រើសផ្សេងលើពាណិជ្ជកម្ម និងការតាំងទីលំនៅទៅវិញទៅមក ដែលយន្តការនោះមិនត្រូវបានគ្រប់គ្រងដោយលោកខាងលិច ហើយរួមគ្នាប្រឆាំងនឹងការរឹតបន្តឹងជាឯកតោភាគីខុសច្បាប់។ ហើយក្នុងពេលជាមួយគ្នានេះ យើងនឹងកសាងស្ថាបត្យកម្មនៃសន្តិសុខស្មើភាពគ្នា និងមិនអាចបំបែកបាន នៅអឺរ៉ុប-អាស៊ី»។

លើសពីនេះទៀត លោកបានអរគុណដល់កូរ៉េខាងជើង ចំពោះការគាំទ្រនូវអ្វីដែលរុស្ស៊ីហៅថា ប្រតិបត្តិការយោធាពិសេស ក្នុងប្រទេសអ៊ុយក្រែន ហើយបានប្តេជ្ញាថា នឹងគាំទ្រដល់កិច្ចខិតខំប្រឹងប្រែងរបស់ទីក្រុងព្យុងយ៉ាង ដើម្បីការពារផលប្រយោជន៍របស់ខ្លួន បើទោះបីជាមាននូវអ្វី ដែលលោកហៅថា «ការដាក់សម្ពាធ ការសម្លុតរកប្រយោជន៍ និងការគំរាមកំហែងផ្នែកយោធារបស់សហរដ្ឋអាមេរិក» ក៏ដោយ។

គួរបញ្ជាក់ថា អត្ថបទនេះត្រូវបានផ្សព្វផ្សាយឡើង ១ថ្ងៃបន្ទាប់ពីប្រទេសទាំង២ បានប្រកាសថា លោក ពូទីន នឹងធ្វើទស្សនកិច្ចនៅកូរ៉េខាងជើងជាលើកដំបូង ក្នុងរយៈពេល ២៤ឆ្នាំ រយៈពេល ២ថ្ងៃ ដែលចាប់ផ្តើមពីថ្ងៃអង្គារនេះ៕