នៅក្នុងបទសម្ភាសន៍ជាមួយប្រព័ន្ធផ្សព្វផ្សាយចិន Guancha នាយករដ្ឋមន្ត្រី លោក Anwar Ibrahim បានឲ្យដឹងថា ប្រទេសម៉ាឡេស៊ីកំពុងរៀបចំខ្លួន ដើម្បីចូលរួមជាមួយក្រុមប្រទេសកំពុងមានសេដ្ឋកិច្ចកំពុងរីកចម្រើន BRICS។

គួរបញ្ជាក់ថា ប្រទេសដើមដំបូងនៃក្រុម BRICS រួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ដែលបង្កើតបានជាអក្សរកាត់នេះ។ តែក្រុមនេះកាលពីឆ្នាំមុន បានចាប់ផ្តើមពង្រីកសមាជិកភាពរបស់ខ្លួន ខណៈដែលប្លុកសម្លឺងមើលដល់ការប្រឈមនូវសណ្តាប់ធ្នាប់ពិភពលោក ដែលគ្រប់គ្រងដោយក្រុមប្រទេសសេដ្ឋកិច្ចលោកខាងលិច ដោយអារ៉ាប៊ីសាអ៊ូឌីត អ៊ីរ៉ង់ អេត្យូពី អេហ្ស៊ីប អាហ្សង់ទីន និងអារ៉ាប់រួម បានចូលរួម ហើយប្រទេសជាង ៤០ទៀត បង្ហាញពីចំណាប់អារម្មណ៍។

យោងតាមវីដេអូនៃកិច្ចសម្ភាសន៍ដែលបង្ហោះដោយប្រព័ន្ធផ្សព្វផ្សាយ Guancha កាលពីថ្ងៃអាទិត្យចុងសប្ដាហ៍កន្លងមក លោក Anwar បាននិយាយថា៖ «យើងបានធ្វើការសម្រេចចិត្ត។ យើងនឹងដាក់នីតិវិធីផ្លូវការក្នុងពេលឆាប់ៗនេះ។ យើងត្រឹមតែរង់ចាំលទ្ធផលចុងក្រោយពីរដ្ឋាភិបាលនៅអាហ្វ្រិកខាងត្បូងប៉ុណ្ណោះ»។

អ្នកតំណាងម្នាក់មកពីការិយាល័យរបស់លោក Anwar នៅថ្ងៃអង្គារ (ទី១៨ ខែមិថុនា) នេះ បានបញ្ជាក់អះអាងពីការអត្ថាធិប្បាយរបស់លោកទៅកាន់សារព័ត៌មាន Reuters។ តែយ៉ាងណាក្ដី អំឡុងកិច្ចសម្ភាសន៍នោះ លោកមិនបានផ្តល់ព័ត៌មានលម្អិតបន្ថែមទៀត អំពីដំណើរការនៃការដាក់ពាក្យនោះឡើយ៕