កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បានបង្ហាញឱ្យដឹងថា បុគ្គលិកផ្តល់ជំនួយប្រមាណ៥០នាក់ បានបាត់បង់ជីវិត ខណៈកំពុងបំពេញកាតព្វកិច្ចមនុស្សធម៌ នៅក្នុងប្រទេសអេត្យូពី ក្នុងឆ្នាំ២០២៤ នេះ។

កម្មវិធីស្បៀងអាហារពិភពលោក WFP បាននិយាយនៅក្នុងរបាយការណ៍សង្ខេប ស្តីពីប្រទេសអេត្យូពីដែលបានចេញផ្សាយថា ស្ថានភាពអសន្តិសុខកំពុងធ្វើឲ្យប៉ះពាល់ដល់ប្រតិបត្តិការមនុស្សធម៌របស់ខ្លួន នៅក្នុងតំបន់ផ្សេងៗគ្នា នៅប្រទេសអាហ្វ្រិកខាងកើតមួយនេះ។ របាយការណ៍ និយាយថា អ្នកស្លាប់ ដែលជាបុគ្គលិកផ្តល់ជំនួយចុងក្រោយគេ គឺជាអ្នកបើកបររថយន្តរបស់អង្គការដៃគូសហប្រតិបត្តិការកម្មវិធីស្បៀងអាហារពិភពលោក WFP ដែលថ្មីៗនេះត្រូវបានបាញ់សម្លាប់ នៅក្នុងតំបន់ Amhara ប្រទេសអេត្យូពី។

អ្នកបើកបររថយន្តរូបនេះ គឺជាបុគ្គលិកម្នាក់ក្នុងចំណោមបុគ្គលិកផ្តល់ជំនួយចំនួន៥០នាក់ ដែលបានបាត់បង់ជីវិតក្នុងកាតព្វកិច្ចមនុស្សធម៌ នៅក្នុងប្រទេសអេត្យូពី ក្នុងឆ្នាំ២០២៤នេះ។

កម្មវិធីស្បៀងអាហារពិភពលោក WFP និយាយបន្ថែមថា អង្គការនៅតែបន្តប្រឈមមុខទៅនឹងការរំខានដល់ខ្សែច្រវ៉ាក់ផ្គត់ផ្គង់រាល់សកម្មភាពរបស់ខ្លួន ដោយសារភាពអសន្តិសុខ ការបិទផ្លូវ និងកង្វះប្រេងឥន្ធនៈ។

បញ្ហាទាំងនេះ បានធ្វើឲ្យប៉ះពាល់ដល់ប្រសិទ្ធភាពប្រតិបត្តិការរបស់កម្មវិធីស្បៀងអាហារពិភពលោក WFP សម្រាប់ទាំងធនធាន និងពេលវេលា។

ទន្ទឹមនឹងនេះ នៅក្នុងខែកុម្ភៈ ឆ្នាំនេះ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (UNOCHA) បាននិយាយថា ចាប់តាំងពីឆ្នាំ២០១៩ មក បុគ្គលិកផ្តល់ជំនួយចំនួន៤៦នាក់ បានបាត់បង់ជីវិត នៅក្នុងប្រទេសអេត្យូពី ដែលក្នុងចំនួននេះ ៣៦នាក់ស្លាប់ដោយសារជម្លោះ នៅភាគខាងជើងប្រទេសអេត្យូពី។