ឯកឧត្តម គី តិច ប្រធានក្រុមមេធាវីស្ម័គ្រចិត្តសម្តេចតេជោសែន បានបញ្ជាក់ប្រាប់ទូរទស្សន៍ BTV នៅរសៀលថ្ងៃទី១៨ ខែមិថុនានេះថា នៅព្រឹកថ្ងៃទី១៨ ខែមិថុនានេះ សម្ដេចអគ្គមហាសេនាបតី តេជោ ហ៊ុន សែន ប្រធានព្រឹទ្ធសភានៃកម្ពុជា បានចាត់ឱ្យមេធាវីស្ម័គ្រចិត្តរបស់សម្តេចទៅជួប និង​ជួយការពារក្ដីជូនក្រុមគ្រួសារជនរងគ្រោះដែលរងអំពើបាញ់ប្រហារពីសំណាក់ ឧកញ៉ា ស្រី ស៊ីណា នៅខណ្ឌច្បារអំពៅ។

ឯកឧត្តម គី តិច បានថ្លែងថា សម្ដេចតេជោ ហ៊ុន សែន បានណែនាំឱ្យលោកចុះទៅជួបគ្រួសារ​ជនរង​គ្រោះ ដើម្បីផ្ដល់មេធាវីការពារក្ដីតាមផ្លូវច្បាប់ ស្របទៅតាម​ផ្លូវតុលាការ​ជូន​គ្រួសារ​ជន​រង​គ្រោះ។ ក្រោយទទួលបានការណែនាំ ឯកឧត្តម បានចុះទៅជួបគ្រួសារជនរងគ្រោះ ខាងប្រុស ចំណែក​ជងរងគ្រោះខាងស្រីកំពុងរៀបចំពិធីបុណ្យ នៅស្រុកកំណើតស្ថិតក្នុងខេត្តកំពត។

ឯកឧត្តមបញ្ជាក់ថា «ចំពោះការ ការពារក្ដីនេះ គឺយើងអាស្រ័យទៅលើគ្រួសាររងគ្រោះ។ ឥឡូវ​នៅ​ខាងខេត្តកំពត ពូបានចាត់ក្រុមេធាវីស្ម័គ្រចិត្តសម្ដេចតេជោសែនទៅ ៣ រូប ដើម្បីទៅជួប​គ្រួសាររង​គ្រោះ ហើយគ្រួសាររងគ្រោះប្រុស ពូបានជួបហើយ គឺពួកគាត់មានក្ដីរំភើប​នៅ​ពេលដែ​លទ​ទួល​បាន​ក្រុម​មេធាវីស្ម័គ្រចិត្តដែលសម្ដេចតេជោចាត់ទៅជួយការពារក្ដីជូនពួកគាត់»។

សូមជម្រាបថា ក្រោយទទួលដំណឹងដ៏រន្ធត់ នៃអំពើបាញ់ប្រហារពីសំណាក់ឧកញ៉ា ស្រី ស៊ីណា, សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ​បានចាត់ឱ្យបញ្ជូនមេធាវីស្ម័គ្រចិត្តសម្ដេចតេជោសែន ដឹកនាំដោយឱ្យ​ឯកឧត្តម គី តិច បានចុះទៅជួបគ្រួសារជនរងគ្រោះដោយផ្ទាល់រួចរាល់ហើយ​នៅរសៀលនេះ​ដល់ទីតាំងដែលកំពុងរៀបចំធ្វើបុណ្យសពខាងបុរស ស្ថិតក្នុងវត្តចាស់ ខណ្ឌជ្រោយចង្វារ (ក្បែរសណ្ឋាគារសុខាភ្នំពេញ) និងមួយក្រុមទៀតទៅដល់ទីតាំងបុណ្យសពខាងស្ត្រី នៅខេត្តកំពត។

ក្រុមគ្រួសាររបស់ជនរងគ្រោះ មានក្ដីរំភើប និងបានគោរពថ្លែងអំណរគុណយ៉ាងក្រៃលែង ជូនចំពោះសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ដែលបានចាត់បញ្ជូន ផ្ដល់មេធាវីស្ម័គ្រចិត្តសម្ដេចតេជោសែន ជួយការពារក្ដីជូនក្រុមគ្រួសាររបស់ពួកគាត់ដែល​ជាជនរងគ្រោះ។

សូមរំលឹកថា ករណីឃាតកម្មបាញ់ប្រហារដ៏រន្ធត់មួយនេះ បានកើតឡើងនៅរសៀលថ្ងៃទី១៧ ខែមិថុនា ឆ្នាំ២០២៤ ស្ថិតក្នុងបុរីប៉េងហួតបឹងស្នោរ សង្កាត់និរោធ៍ ខណ្ឌច្បារអំពៅ បណ្ដាលឲ្យមនុស្ស២នាក់ស្លាប់ ដែលជាគូដណ្ដឹងនឹងគ្នា និង២នាក់ផ្សេងទៀតរងរបួស។

ជនរងគ្រោះទាំង៤នាក់ ក្នុងហេតុការណ៍នេះ រួមមាន៖ ទី១៖ឈ្មោះឡុង លីសុង អាយុ២៧ឆ្នាំ មុខរបរអ្នកថតរូប (ស្លាប់), ទី២៖ឈ្មោះ ឃីម កញ្ចនា ភេទស្រី អាយុ២៦ឆ្នាំ មុខរបរអ្នកថតរូប (ស្លាប់), ទី៣៖ឈ្មោះ សុខុម រ៉ាចាណៈ អាយុ២០ឆ្នាំ មុខរបរអ្នកថតរូប (រងរបួស) និងទី៤៖ឈ្មោះ ហុង រិទ្ធធារ័ក្ស អាយុ២៤ឆ្នាំ មុខរបរអ្នកថតរូប (រងរបួសស្រាល)។ ពួកគេទាំង៤នាក់ ស្នាក់នៅផ្ទះកើតហេតុខាងលើ។ ដោយឡែក ខ្មាន់កាំភ្លើងដែលមាន​គោរមងារជា​ឧកញ៉ាទៀតនោះ ឈ្មោះ ស្រី ស៊ីណា មានអាយុ៥០ឆ្នាំ ស្នាក់នៅសង្កាត់បឹងកេងកង៣ ខណ្ឌបឹងកេងកង៕