ប្រធានាធិបតីស្លូវ៉ាគី លោក Peter Pellegrini នៅថ្ងៃអង្គារ (ទី១៨ ខែមិថុនា) នេះ បាននិយាយថា ប្រទេសរបស់លោកគាំទ្រការតែងតាំងដែលត្រូវបានស្នើឡើងរបស់លោក Mark Rutte ដើម្បីធ្វើតួនាទីជាអគ្គលេខាធិការអង្គការណាតូ (NATO) នាពេលបន្ទាប់ ដោយនេះជាប្រទេសមួយក្នុងចំណោមប្រទេសចុងក្រោយ ក្នុងសម្ព័ន្ធភាពដែលគាំទ្រនាយករដ្ឋមន្ត្រីជិតផុតអាណត្តិរបស់ប្រទេសហូឡង់។

គួរបញ្ជាក់ថា សហរដ្ឋអាមេរិក អង់គ្លេស បារាំង និងអាល្លឺម៉ង់ សុទ្ធតែគាំទ្រឲ្យលោក Rutte ស្នងតំណែងលោក Jens Stoltenberg ដែលនឹងចុះចេញពីតំណែងប្រធានអង្គការណាតូ នៅខែតុលា។

ដោយឡែក ប្រទេសហុងគ្រីក៏បានបោះបង់ចោលគោលបំណងរបស់ខ្លួន ក្នុងការប្រជែងជាមួយលោក Rutte ផងដែរ។ នេះបើតាមប្រព័ន្ធផ្សព្វផ្សាយហូឡង់ ដែលបានរាយការណ៍នៅថ្ងៃអង្គារ (ទី១៨ ខែមិថុនា) នេះ។ ហើយកាលពីខែមេសា ទួរគីបានប្រាប់សម្ព័ន្ធមិត្តរបស់ខ្លួនថា ខ្លួននឹងគាំទ្រលោក Rutte។

សូមបញ្ជាក់បន្ថែមថា អង្គការណាតូត្រូវការការសម្រេចដោយឯកច្ឆន្ទ ដូច្នេះ បេក្ខជនណាក៏ដោយត្រូវការការគាំទ្រពីប្រទេសសម្ព័ន្ធមិត្តទាំង៣២។ ដោយមានសញ្ញាយល់ស្របពីស្លូវ៉ាគី និងហុងគ្រី ឥឡូវនេះ លោក Rutte កំពុងរង់ចាំតែការគាំទ្រពីប្រទេសរ៉ូម៉ានីប៉ុណ្ណោះ។

កាលពីខែមីនា ប្រធានាធិបតីរ៉ូម៉ានី លោក Klaus Iohannis បាននិយាយថា លោកកំពុងឈរឈ្មោះ ប្រជែងយកតួនាទីកំពូលរបស់អង្គការណាតូ ដោយលើកហេតុផលថា រដ្ឋនៅអឺរ៉ុបខាងកើតត្រូវការតំណាងប្រសើរជាងនេះ នៅក្នុងតួនាទីដឹកនាំរបស់ Euro-Atlantic (អឺរ៉ូ-អាត្លង់ទិក)»៕