គណៈកម្មាធិការនីតិប្បញ្ញត្តិដ៏មានឥទ្ធិពលរបស់ប្រទេសហ្វាំងឡង់ នៅថ្ងៃអង្គារ (ទី១៨ ខែមិថុនា) នេះ បានប្រាប់ឲ្យដឹងថា សំណើរបស់រដ្ឋាភិបាល ដើម្បីបដិសេធជាបណ្តោះអាសន្ន ចំពោះអ្នកស្វែងរកសិទ្ធិជ្រកកោនដែលទៅដល់កន្លែងឆ្លងកាត់ព្រំដែនរបស់ប្រទេសជាមួយប្រទេសរុស្ស៊ី អាចត្រូវបានទទួលយកដោយសភា ប្រសិនបើការកែសម្រួលមួយចំនួន ត្រូវបានធ្វើឡើង។

ការប្រកាសដោយប្រធានគណៈកម្មាធិការធម្មនុញ្ញរបស់សភាហ្វាំងឡង់ បើកផ្លូវឲ្យសំណើដ៏ចម្រូងចម្រាសមួយនេះ ទទួលបានអនុម័តនៅក្នុងការបោះឆ្នោតពេញអង្គ នៅពេលក្រោយ។

គួរបញ្ជាក់ថា កាលពីខែឧសភា រដ្ឋាភិបាលបានបង្ហាញនូវច្បាប់ដែលអនុញ្ញាតឲ្យឆ្មាំព្រំដែនរារាំងដល់ជនអន្តោប្រវេសន៍ នៅកន្លែងឆ្លងកាត់ព្រំដែនដែលជាព្រៃឈើដ៏វែង ជាមួយរុស្ស៊ី មិនឲ្យស្វែងរកសិទ្ធិជ្រកកោន បើទោះបីជាការទទួលស្គាល់ថា ច្បាប់នេះនឹងប្រឆាំងជាមួយនឹងការប្តេជ្ញាចិត្តផ្នែកសិទ្ធិមនុស្សក៏ដោយ។

ប្រទេសហ្វាំងឡង់ជឿថា ទីក្រុងមូស្គូកំពុងជំរុញឲ្យមានការឆ្លងកាត់ព្រំដែន ដើម្បីជាការសងសឹក ចំពោះការចូលរួមរបស់ទីក្រុង Helsinki ដែលគាំទ្រអ៊ុយក្រែនប្រឆាំងនឹងការលុកលុយរបស់រុស្ស៊ី។ វិមានក្រឹមឡាំងបដិសេធការចោទប្រកាន់នេះ ហើយជនអន្តោប្រវេសន៍តិចតួចណាស់ បានទីដល់ទីនោះ ក្នុងរយៈពេលប៉ុន្មានខែថ្មីៗនេះ៕