នាយកប្រតិបត្តិជាន់ខ្ពស់នៅទីភ្នាក់ងារទេសន្តរប្រវេសន៍របស់អង្គការសហប្រជាជាតិ កាលពីថ្ងៃអង្គារ (១៨ មិថុនា) បានព្រមានពីផលវិបាកមនុស្សធម៌ដ៏មហន្តរាយពីតួលេខកើនឡើងដ៏សន្ធឹកនៃជនជាតិហៃទី ដែលត្រូវបង្ខំចិត្តភៀសខ្លួនចេញពីផ្ទះសម្បែងរបស់ពួកគេ ដោយសារតែអំពើហិង្សាដែលបង្កឡើងដោយជម្លោះជាមួយក្រុមជនអន្ធពាលប្រដាប់អាវុធ។

លោក ហ្វីលីប ប្រាញ់ឆាត (Philippe Branchat) ដែលជាប្រធានអង្គការទេសន្តរប្រវេសន៍អន្តរជាតិ (IOM) នៅប្រទេសហៃទី បាននិយាយថា៖ «តួលេខដែលយើងឃើញនៅថ្ងៃនេះគឺជាផលវិបាកផ្ទាល់នៃរយៈពេលជាច្រើនឆ្នាំនៃអំពើហិង្សាដ៏ធ្ងន់ធ្ងរដែលកំពុងកើនឡើង»។

មនុស្សស្ទើរតែ ៥៨០.០០០ នាក់នៅក្នុងប្រទេសហៃទី ត្រូវបានផ្លាស់ទីលំនៅខាងក្នុង ដោយនោះប្រហែល ៥ ភាគរយនៃចំនួនប្រជាជនសរុបរបស់ប្រទេសសមុទ្រការ៉ាអ៊ីបមួយនេះ នេះបើយោងទៅតាមការវាយតម្លៃទូទាំងប្រទេសចុងក្រោយរបស់អង្គការ IOM ដែលនេះជាកំណើន ៦០ ភាគរយលើចំនួន ៣៦០.០០០ នាក់ត្រឹមតែបីខែមុនប៉ុណ្ណោះ។ ចំនួនអ្នកភៀសខ្លួនដ៏ខ្ពស់នេះបានរួមចំណែកដល់មនុស្សជិត ៥ លាននាក់ ដែលជាតួលេខជិតពាក់កណ្តាលនៃចំនួនប្រជាជន ប្រឈមនឹងភាពអត់ឃ្លានធ្ងន់ធ្ងរ។

ជនភៀសខ្លួនទាំងនោះតែងតែរត់ភៀសខ្លួនដោយមិនមានយករបស់របរអ្វីច្រើនឡើយក្រៅតែពីសម្លៀកបំពាក់ជាប់នឹងខ្លួន ហើយជារឿយៗបានបាត់បង់ការងារនិងផ្ទះសម្បែង។ ពួកគេភាគច្រើនបានធ្វើដំណើរទៅភាគខាងត្បូង និងស្នាក់នៅជាមួយអ្នកស្រុកនៅទីនោះ ដែលជាបន្ទុកបន្ថែមទៀតសម្រាប់តំបន់ដែលសេដ្ឋកិច្ចចុះខ្សោយរួចទៅហើយដោយសារការបំផ្លិចបំផ្លាញក្នុងគ្រោះរញ្ជួយដីឆ្នាំ២០២១៕