កម្ដៅខ្លាំងក្លាដ៏គ្រោះថ្នាក់ និងសំណើមខ្ពស់បានវាយលុកភាគកណ្តាល និងភាគឦសានរបស់សហរដ្ឋអាមេរិកកាលពីថ្ងៃអង្គារ (១៨ មិថុនា) ជាមួយនឹងសីតុណ្ហភាពកម្រិតកំណត់ត្រាដែលរំពឹងថានឹងបន្តកើនឡើងក្នុងរយៈពេលប៉ុន្មានថ្ងៃខាងមុខនេះ ខណៈចំហេះព្រៃបានឆាបឆេះនៅភាគខាងលិច។

សេវាអាកាសធាតុជាតិបាននិយាយថា «រលកកម្ដៅនឹងបន្តនៅទូទាំងតំបន់ ហ្គ្រេត លេកស៍ (Great Lakes) ជ្រលងភ្នំរដ្ឋ អូហាយអូ (Ohio) និងភាគឦសានក្នុងរយៈពេលពីរបីថ្ងៃខាងមុខ ហើយដោយពន្យល់ថា ការមកដល់មុនពេលនៃរលកកម្ដៅនៅរដូវក្តៅនេះធ្វើឱ្យបញ្ហាអាកាសធាតុកាន់តែគ្រោះថ្នាក់។

ក្រុមអ្នកព្យាករបាននិយាយថា សីតុណ្ហភាពអាចឡើងដល់ប្រហែល ៣៨ អង្សាសេ នៅក្នុងផ្នែកខ្លះនៃតំបន់ ញូវ អ៊ីងលែន (New England) នៅថ្ងៃព្រហស្បតិ៍។

ទីភ្នាក់ងារអាកាសធាតុបាននិយាយថា «ការរីករាលដាលនៃកម្ដៅ និងសីតុណ្ហភាពខ្ពស់កម្រិតបំបែកកំណត់ត្រាជាច្រើន មានភាពអាចទៅរួចទៅទូទាំងប្រទេស» ដោយបន្ថែមថាកម្ដៅនឹងមិនថយចុះខ្លាំងទេនៅពេលយប់ ហើយព្រមានថាអ្នកដែលគ្មានម៉ាស៊ីនត្រជាក់អាចរងផលប៉ះពាល់ខ្លាំងជាពិសេស។

ការិយាល័យអាកាសធាតុរបស់រដ្ឋ អ៊ីលីណយស៍ (Illinois State) បាននិយាយនៅលើបណ្ដាញសង្គម Xថា នៅទីក្រុងឈីកាហ្គោ (Chicago) រលកកម្ដៅមុនពេល និងអូសបន្លាយបែបនេះមិនត្រូវបានគេឃើញចាប់តាំងពីឆ្នាំ១៩៣៣ មក។ សហគមន៍វិទ្យាសាស្ត្រពិភពលោកយល់ស្របថា បម្រែបម្រួលអាកាសធាតុដែលបង្កឡើងដោយមនុស្សកំពុងជំរុញកម្ដៅផែនដីក្នុងអត្រាគួរឱ្យព្រួយបារម្ភ៕