ប្រធានាធិបតីសហរដ្ឋអាមេរិក លោក Joe Biden បានប្រកាសពីការខិតខំប្រឹងប្រែងធំបំផុតមួយក្នុងប្រវត្តិសាស្ត្រ ដើម្បីផ្តល់ភាពស្របច្បាប់ដល់ជនអន្តោប្រវេសន៍គ្មានឯកសារ កាលពីថ្ងៃអង្គារ ដោយផ្តល់មធ្យោបាយចូលសញ្ជាតិដល់ជនអន្តោប្រវេសន៍រាប់សែននាក់ នៅក្នុងសហរដ្ឋអាមេរិកដោយខុសច្បាប់ នូវអ្នកទាំងឡាយណាដែលបានរៀបអាពាហ៍ពិពាហ៍ជាមួយពលរដ្ឋអាមេរិក។ វាជាចំណាត់ការក្នុងឆ្នាំបោះឆ្នោត ដែលផ្ទុយគ្នាស្រឡះ ទៅនឹងផែនការរបស់លោក Donald Trump ជាគូប្រជែងក្នុងការបោះឆ្នោត សម្រាប់ផែនការនិរទេសជនអន្តោប្រវេសន៍ទ្រង់ទ្រាយធំ។

ជាការពិត ការស្ទង់មតិបង្ហាញថា ជនជាតិអាមេរិកជាង៧០ភាគរយ គាំទ្រកិច្ចខិតខំប្រឹងប្រែងនេះ ដើម្បីរក្សាគ្រួសារឱ្យនៅរួមរស់ជាមួយគ្នា ហើយហេតុផលគឺសាមញ្ញ វាប្រកាន់យកគោលការណ៍អាមេរិក ដែលយើងគួររក្សាគ្រួសារឱ្យនៅរួមរស់ជាមួយគ្នា។

យោងតាមសេតវិមាន និងក្រសួងសន្តិសុខបានឲ្យដឹងថា កម្មវិធីនេះនឹងបើកសម្រាប់ប្តីប្រពន្ធប្រមាណ ៥០០.០០០ នាក់ ជាអ្នកដែលបានរស់នៅក្នុងសហរដ្ឋអាមេរិក យ៉ាងហោចណាស់១០ឆ្នាំ។

អ្នកទាំងឡាយដែលត្រូវបានចាត់ទុកថាជាការគំរាមកំហែងផ្នែកសន្តិសុខសាធារណៈ ឬអ្នកដែលមានប្រវត្តិឧក្រិដ្ឋកម្ម ពុំមានលក្ខណៈសម្បត្តិគ្រប់គ្រាន់ នឹងពុំមានសិទ្ធិទទួលបានកម្មវិធីនេះទេ។

លោក Biden ជាអ្នកប្រជាធិបតេយ្យដែលកំពុងស្វែងរកអាណត្តិទីពីរនៅក្នុងការបោះឆ្នោតប្រធានាធិបតី នៅខែវិច្ឆិកា បានចូលកាន់តំណែងដោយប្តេជ្ញាថានឹងផ្លាស់ប្តូរគោលនយោបាយអន្តោប្រវេសន៍ដ៏តឹងរ៉ឹងរបស់លោក Trump ។

ប៉ុន្តែដោយបានប្រឈមមុខទៅនឹងកម្រិតនៃការចាប់ខ្លួនជនអន្តោប្រវេសន៍នៅព្រំដែនអាមេរិក-ម៉ិកស៊ិក លោក Biden បានពង្រឹងវិធីសាស្រ្តរបស់លោកក្នុងរយៈពេលប៉ុន្មានខែថ្មីៗនេះ ដោយរារាំងជនអន្តោប្រវេសន៍ភាគច្រើនឆ្លងកាត់ព្រំដែនមិនឲ្យស្នើសុំសិទ្ធិជ្រកកោន។ កម្មវិធីស្របច្បាប់ ដែលបានគ្រោងទុករបស់លោក Biden សម្រាប់ប្តីឬប្រពន្ធរៀបការជាមួយពលរដ្ឋអាមេរិក អាចធ្វើឲ្យរឹងមាំសារយុទ្ធនាការរបស់លោកថា លោក គាំទ្រប្រព័ន្ធអន្តោប្រវេសន៍ដែលមានមនុស្សធម៌។