ព្រឹទ្ធសភារបស់ប្រទេសថៃ បានអនុម័តអំណានចុងក្រោយនៃច្បាប់សមភាពអាពាហ៍ពិពាហ៍កាលពីថ្ងៃអង្គារ (១៨ មិថុនា) ដោយត្រួសត្រាយផ្លូវឱ្យប្រទេសនេះក្លាយជាប្រទេសដំបូងគេនៅអាស៊ីអាគ្នេយ៍ដែលទទួលស្គាល់គូស្នេហ៍អ្នកស្រលាញ់ភេទដូចគ្នា។ សេចក្តីព្រាងច្បាប់ ដែលជាចំណុចកំពូលនៃកិច្ចខិតខំប្រឹងប្រែងជាងពីរទសវត្សរ៍របស់សកម្មជននេះ ត្រូវបានគាំទ្រដោយសមាជិកសភាក្នុងសំឡេងភាគច្រើនលើសលប់នៅក្នុងសភាជាន់ខ្ពស់។

សំណើច្បាប់ ដែលត្រូវការរាជានុម័តពីព្រះមហាក្សត្រនេះ នឹងចូលជាធរមានរយៈពេល ១២០ ថ្ងៃបន្ទាប់ពីវាត្រូវបានចុះផ្សាយនៅក្នុងសារព័ត៌មានរាជវង្សរបស់ថៃ ដែលមានន័យថាអាពាហ៍ពិពាហ៍ភេទដូចគ្នាលើកដំបូងអាចនឹងធ្វើទៅបាននៅចុងឆ្នាំនេះ។ នាយករដ្ឋមន្ត្រីថៃ លោក សេដ្ឋាថា ថាវីស៊ីន (Srettha Thavisin) បាននិយាយនៅក្នុងសារបង្ហោះនៅលើបណ្ដាញសង្គម X ថា «ថ្ងៃនេះយើងប្រារព្ធអបអរព្រឹត្តិការណ៍សំខាន់មួយទៀតនៅក្នុងដំណើរនៃសំណើច្បាប់សមភាពអាពាហ៍ពិពាហ៍ (អាពាហ៍ពិពាហ៍ភេទដូចគ្នា) របស់យើង»។

ក្រុមអ្នកតស៊ូមតិសម្រាប់អ្នកស្រឡាញ់ភេទដូចគ្នា បានហៅវិធានការនេះថាជា «ការបោះជំហានទៅមុខដ៏អស្ចារ្យមួយ» ដោយសារប្រទេសថៃ នឹងក្លាយជាប្រទេសទីមួយនៅអាស៊ីអាគ្នេយ៍ដែលអនុម័តច្បាប់សមភាពអាពាហ៍ពិពាហ៍បែបនេះ និងស្ថិតក្នុងលេខរៀងទីបីនៅអាស៊ី បន្ទាប់ពីនេប៉ាល់ និងកោះតៃវ៉ាន់។ សមាជិកសភា និងសកម្មជនត្រូវបានគេមើលឃើញអបអរនៅក្នុងសភាថៃ ដោយគ្រវីទង់ឥន្ទធនូពោរពេញដោយស្នាមញញឹម ដោយអ្នកខ្លះលើកដៃឡើងក្នុងសាមគ្គីភាពជាមួយសហគមន៍អ្នកស្រឡាញ់ភេទដូចគ្នា ។

ប្រទេសថៃ ដែលជាគោលដៅទេសចរណ៍ដ៏ពេញនិយមបំផុតមួយរបស់អាស៊ី ត្រូវបានគេស្គាល់រួចទៅហើយសម្រាប់វប្បធម៌អ្នកស្រលាញ់ភេទដូចគ្នា (LGBT) និងការអត់ឱនសម្រាប់ភេទទីបី។ នៅដើមខែមិថុនា ប្រជាពលរដ្ឋ និងសកម្មជនរាប់ពាន់នាក់បានដង្ហែរក្បួនតាមដងផ្លូវក្នុងទីក្រុងបាងកក ហើយត្រូវបានចូលរួមដោយលោកនាយករដ្ឋមន្ត្រី សេដ្ឋា ដែលបានពាក់អាវឥន្ទធនូ ដើម្បីអបអរទិវាឥន្ទធនូ (Pride Month) សម្រាប់អ្នកស្រលាញ់ភេទដូចគ្នា៕