ទីក្រុងសេអ៊ូល បាននិយាយថា ទាហានកូរ៉េខាងជើង រាប់សិបនាក់បានឆ្លងកាត់ព្រំដែនរយៈពេលខ្លីកាលពីថ្ងៃអង្គារ (១៨ មិថុនា) ប៉ុន្តែបានចេញទៅវិញបន្ទាប់ពីមានការបាញ់ព្រមាន នៅក្នុងឧប្បត្តិហេតុបែបនេះជាលើកទីពីរក្នុងរយៈពេលពីរសប្តាហ៍ នៅពេលដែលក្រុងព្យុងយ៉ាង ពង្រឹងព្រំដែនរបស់ខ្លួនជាមួយកូរ៉េខាងត្បូង។

អគ្គសេនាធិការចម្រុះ (JCS) របស់កូរ៉េខាងត្បូងបាននិយាយថា ការផ្ទុះគ្រាប់មីននៅជិតព្រំដែនក៏បានធ្វើឱ្យទាហានកូរ៉េខាងជើងជាច្រើននាក់រងរបួសផងដែរ ដោយបន្ថែមថា ថ្មីៗនេះទីក្រុងព្យុងយ៉ាង បានដាក់ពង្រាយកងទ័ពនៅក្នុងតំបន់នេះដើម្បីបោសសម្អាត ដកចេញ និងដាក់គ្រាប់មីនបន្ថែម ខណៈដែលទំនាក់ទំនងរវាងកូរ៉េទាំងពីរបានធ្លាក់ចុះ។

អគ្គសេនាធិការ JCS និយាយថា ខ្លួនជឿជាក់ថាការឆ្លងព្រំដែនកាលពីថ្ងៃអង្គារ គឺដូចនឹងកាលពីលើកមុននៅថ្ងៃទី០៩ ខែមិថុនា ដែរគឺជាការចៃដន្យប៉ុណ្ណោះ ដោយទាហានកូរ៉េខាងជើងពី ២០ ទៅ ៣០ នាក់ប្រដាប់ដោយឧបករណ៍ការងារព្រំដែន ហើយហេតុការណ៍នេះបានកើតឡើងប្រហែលម៉ោង ៨:៣០ ព្រឹកថ្ងៃអង្គារ (ម៉ោងក្នុងស្រុក)។

មន្ត្រីរូបនេះបាននិយាយថា ទាហានកូរ៉េខាងជើងដែលមានភារកិច្ចពង្រឹងព្រំដែនបានទទួលរង «ការស្លាប់ និងរបួសជាច្រើនពីឧប្បត្តិហេតុផ្ទុះគ្រាប់មីនម្តងហើយម្តងទៀត» ប៉ុន្តែពួកគេហាក់ដូចជាកំពុងបន្តប្រតិបត្តិការដោយមិនប្រុងប្រយ័ត្ននោះទេ។

ការឆ្លងចូលព្រំដែនលើកដំបូងកាលពីដើមខែនេះ បានកើតឡើងនៅពេលដែលកូរ៉េខាងជើង បញ្ជូនបាឡុងសំរាមជាងមួយពាន់គ្រឿងទៅកូរ៉េខាងត្បូង ជាការឆ្លើយតបនឹងបាឡុងឃោសនាប្រឆាំងនឹងទីក្រុងព្យុងយ៉ាង ដែលបញ្ជូនទៅកូរ៉េខាងជើងដោយសកម្មជន៕