​បាល់ទាត់៖ ​ការប្រកួត​កាលពី​ថ្ងៃអាទិត្យ​នៃ​ក្រប​ខណ្ឌ English Premier League ក្រុម​ជើងឯក Manchester City បាន​បំបែក​កំណត់ត្រា ១១​នាក់​ដំបូង​ដែល​មាន​តម្លៃ​បំផុត​ក្នុង​ប្រវត្តិសាស្ត្រ​បាល់ទាត់​នៅ​លី​គ​កំពូល​អង់គ្លេស​។​ ​​លោក Pep Guardiola បាន​ដាក់​កីឡាករ ១១​នាក់​ដំបូង​ដែល​មាន​តម្លៃ​រួមបញ្ចូល​គ្នា ៥៥៣.៣២​លាន​ផោនដែល​នេះ​ជា​តម្លៃ​រួមបញ្ចូល​គ្នា​ថ្លៃ​បំផុត​។​

យ៉ាងណាក្តី Manchester City នៅតែ​ចាញ់​នៅ​ទឹកដី Tottenham Hotspur ១-០ ដោយ​គ្រាប់​បាល់​របស់​កីឡាករកូរ៉េ Heung-min Son​។​ ​​១១នាក់​ដំបូង​របស់ Manchester City មាន​អ្នកចាំទី Ederson ខ្សែការពារ Joao Cancelo, Benjamin Mendy, Ruben Dias និង Nathan Ake ដែល​អ្នក​ទាំងនេះ​មានតម្លៃ​ជាង ៤០លាន​ផោន​ម្នាក់ៗ​។ ​​នៅ​ខ្សែបម្រើ​មាន​កីឡាករ​ថ្លៃ​បំផុត​នៅ Premier League, Jack Grealish រួមជាមួយ Fernandinho, Ilkay Gundogan ខណៈ​ខ្សែប្រយុទ្ធ​មាន Raheem Sterling, Riyad Mahrez និង Ferran Torres​។

​មិន​ត្រឹមតែ​ប៉ុណ្ណោះ​កីឡាករ​ដែល​អង្គុយ​នៅ​កៅអី​បម្រុង​របស់ Manchester City ក៏​បូក​បញ្ចូល​គ្នា​មានតម្លៃ​ជាង ៣០០លាន​ផោន​ដែរ​។ ​​តម្លៃ ១១នាក់​ខ្ពស់បំផុត​នេះ​បាន​បំបែក​កំណត់ត្រា​ចាស់​របស់ Manchester United ដែល ១១នាក់​បូក​បញ្ចូល​គ្នា​មានតម្លៃ ៤៣៥.៨៥លាន​ផោន​។ ​​ចំណែក Spurs ដែល​យកឈ្នះ Manchester City នោះ​មាន ១១ដំបូង​ដែលមាន​តម្លៃ​បូក​បញ្ចូល​គ្នា​ត្រឹម ១៧៥.១៤លាន​ផោន​ប៉ុណ្ណោះ​៕

​​អត្ថបទ​៖​នាង សុភា​វុ​ធ