អាហ្វហ្គានីស្ថាន៖ ក្រុមតាលីបង់នៅអាហ្វហ្គានីស្ថានបានសង្កត់ធ្ងន់ថា ពួកគេនឹងការពារអាយុជីវិត និងទ្រព្យសម្បត្តិរបស់ប្រជាជន ដែលទំនងជាដើម្បីបន្ធូរបន្ថយការព្រួយបារម្ភថា របបគ្រប់គ្រងបែបអ៊ីស្លាមអាចនឹងវិលត្រឡប់មកវិញ។
មេដឹកនាំទី២ របស់ក្រុមនេះ លោក Mullah Abdul Ghani Baradar បាននិយាយនៅក្នុងសេចក្ដីថ្លែងការណ៍វីដេអូមួយថា តាលីបង់ត្រូវតែបង្ហាញថា យើងអាចបម្រើប្រទេសជាតិរបស់យើង និងធានាសន្តិសុខ និងភាពងាយស្រួលសម្រាប់ជីវិតរស់នៅ។ កងកម្លាំងតាលីបង់បានគ្រប់គ្រងរដ្ឋធានីកាប៊ុល បន្ទាប់ពីពួកគេបានកាន់កាប់ស្ទើរតែគ្រប់រដ្ឋធានីខេត្ត ខណៈកងកម្លាំងអាមេរិកគ្រោងនឹងដកទ័ពចេញឲ្យអស់ពីអាហ្វហ្គានីស្ថាននៅចុងខែនេះ បន្ទាប់ពីប្រតិបត្តិការយោធាជិត ២០ឆ្នាំ។ រដ្ឋាភិបាលបានដួលរលំបន្ទាប់ពីលោកប្រធានាធិបតី Ashraf Ghani ចាកចេញពីប្រទេស។
ក្រុមសកម្មប្រយុទ្ធត្រូវបានគេនិយាយថា បានទៅកាន់ផ្ទះរបស់ប្រជាជននៅទីក្រុងកាប៊ុល ហើយសួរអំពីមុខរបររបស់ពួកគេ។ នេះបង្កឱ្យមានការព្រួយបារម្ភថា ក្រុមនេះកំពុងស្វែងរកមនុស្សដែលសហការជាមួយរដ្ឋាភិបាលអាហ្វហ្គានីស្ថាន ឬរដ្ឋាភិបាលបរទេស។ អ្នកនាំពាក្យក្រុមតាលីបង់ លោក Suhail Shaheen បាននិយាយនៅលើបណ្ដាញធ្វីតធ័រកាលពីថ្ងៃចន្ទថា ក្រុមនេះបានណែនាំដល់យុទ្ធជនរបស់ខ្លួនថា គ្មាននរណាម្នាក់ត្រូវបានអនុញ្ញាតឱ្យចូលក្នុងផ្ទះរបស់នរណាម្នាក់ ដោយគ្មានការអនុញ្ញាតឡើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
