សារព័ត៌មាន The Times of India នៅថ្ងៃពុធ (ទី១៩ ខែមិថុនា) នេះ បានរាយការណ៍ថា រលកកម្តៅក្ដៅខ្លាំងដែលបានកើតមានពាសពេញប្រទេសឥណ្ឌា បានបណ្តាលឲ្យមនុស្សយ៉ាងហោចណាស់ ៥នាក់ ស្លាប់ នៅក្នុងរដ្ឋធានី New Delhi (ញូវដែលី) ក្នុងសប្តាហ៍នេះ។

គួរបញ្ជាក់ថា មនុស្សរាប់ពាន់លាន នៅទូទាំងតំបន់អាស៊ី កំពុងប្រឈមនឹងកម្តៅក្ដៅខ្លាំង នៅរដូវក្តៅនេះ ជានិន្នាការមួយដែលអ្នកវិទ្យាសាស្ត្រនិយាយថា មានសភាពកាន់តែអាក្រក់ទៅៗ ដោយសារបម្រែបម្រួលអាកាសធាតុដែលកើតឡើងដោយស្នាដៃមនុស្ស។

សារព័ត៌មាន បានបន្ថែមថា ការស្លាប់នេះ ត្រូវបានរាយការណ៍កាលពីថ្ងៃទី ១៧ ខែមិថុនា ពីមន្ទីរពេទ្យនានា ក្នុងទីក្រុងរបស់ឥណ្ឌា ដែលមានប្រជាជនចំនួន ២០លាននាក់មួយនេះ ជាកន្លែងដែលមានការខ្វះខាតទឹកកាន់តែខ្លាំងឡើងៗ។

សារព័ត៌មាននេះ បានឲ្យដឹងទៀតថា ការប្រើប្រាស់ថាមពលរបស់រដ្ឋធានីនេះ ឈានដល់កម្រិតខ្ពស់ជាកំណត់ត្រា កាលពីថ្ងៃទី១៨ ខែមិថុនា នៅពេលដែលសីតុណ្ហភាពអប្បបរមានាពេលយប់ ឡើងដល់ ៣៣,៨អង្សាសេ។

សូមបញ្ជាក់បន្ថែមថា ចាប់តាំងពីខែមីនាមក សីតុណ្ហភាព បានឡើងដល់ ៥០អង្សាសេ ក្នុងទីក្រុងញូវដែលី និងរដ្ឋវាលខ្សាច់ក្បែរនោះ គឺរដ្ឋ Rajasthan ខណៈដែលចំនួនថ្ងៃនៃរលកកម្តៅធម្មតា ត្រូវបានកត់ត្រាក្នុងរដូវកាលនេះ មានរយៈពេលច្រើនជាង ២ដង នៅភាគពាយព្យ និងភាគខាងកើតប្រទេសឥណ្ឌា។

ស្ថានភាពទាំងនេះកើតឡើងដោយសារមានភ្លៀងធ្លាក់តិចជាងមុន និងខ្យល់ក្តៅបក់ពីតំបន់ស្ងួតជិតខាងចូលទៅក្នុងប្រទេសឥណ្ឌា៕