សាកសពទាហានអ៊ុយក្រែនម្នាក់ ត្រូវបានគេរកឃើញដោយក្រុមឈ្លបយកការណ៍តាមអាកាស នៅលើរថយន្តយោធា ដែលរងការខូចខាត កាលពីថ្ងៃចន្ទ។

ករណីនេះ បានកើតឡើង នៅពេលដែលអគ្គរដ្ឋអាជ្ញាអ៊ុយក្រែន បាននិយាយថា ខ្លួនមាន «ភ័ស្តុតាងដ៏គួរឲ្យ រន្ធត់»នៃគោលនយោបាយរុស្ស៊ីថ្មីអំពីការកាត់ក្បាលទាហានដែលជាប់ឃុំ ជំនួសឲ្យការឃុំខ្លួនពួកគេ។

លោករដ្ឋអាជ្ញា Anriy Kostin បានសរសេរនៅលើគេហទំព័រ Twitter ថា៖«យើងបានទទួលព័ត៌មានថា មេបញ្ជាការរុស្ស៊ី បានបញ្ជាមិនឲ្យចាប់អ្នកទោសទាហានអ៊ុយក្រែន ប៉ុន្តែផ្ទុយទៅវិញ សម្លាប់ពួកគេដោយអំពើឃោរឃៅអមនុស្សធម៌ ដោយការកាត់ក្បាល។

លោក Kostin បាននិយាយថា ការកាត់ក្បាលបែបនេះ ត្រូវបានកត់ត្រា នៅក្នុងតំបន់ដូណិតស្ក៍ ( Donetsk)។

លោក Kostin បានបន្ថែមថា៖«ករណីនេះ គឺជាភ័ស្តុតាងមួយទៀត ដែលថា ឧក្រិដ្ឋកម្មសង្រ្គាមដែលប្រព្រឹត្តដោយអ្នកឈ្លានពានមិនមែនជាឧប្បត្តិហេតុដាច់ដោយឡែកនោះទេ ប៉ុន្តែជាយុទ្ធសាស្ត្រ ដែលគ្រោងទុករបស់របបរុស្ស៊ី»។ នេះគឺជាអំពើព្រៃផ្សៃដ៏អាក្រក់ នៅក្នុងសតវត្សរ៍ទី២១ ហើយបទបញ្ជាឧក្រិដ្ឋកម្មទាំងនេះ ត្រូវបានផ្តល់ឲ្យ នៅត្រឹមកម្រិតកងវរសេនាតូច និងថ្នាក់ដឹកនាំកងអនុសេនាធំ។