ភ្នាក់ងារសង្គ្រោះបន្ទាន់ ក្នុងតំបន់ នៅថ្ងៃពុធ (ទី១៩ ខែមិថុនា) បាននិយាយថា អគ្គិភ័យនៅឃ្លាំងស្តុកប្រេងមួយ ក្នុងទីក្រុង Azov របស់តំបន់ Rostov ភាគខាងត្បូងប្រទេសរុស្សី បានបន្តឆាបឆេះអស់រយៈពេលជាង ២៤ម៉ោងមកហើយ។

សឺទែនស្តុកប្រេងជាច្រើនត្រូវបានឆាបឆេះ បន្ទាប់ពីការវាយប្រហារដោយយានដ្រូន កាលពីព្រឹកថ្ងៃអង្គារ ដែលប្រភពចារកម្មអ៊ុយក្រែន បាននិយាយថា ធ្វើឡើងដោយសេវាសន្តិសុខអ៊ុយក្រែន (SBU)។

សេវាសង្គ្រោះបន្ទាន់ បានឲ្យដឹងនៅលើប៉ុស្តិ៍ Telegram នាថ្ងៃពុធនេះថា អគ្គិភ័យនៅតំបន់ Azov បានឆាបឆេះរាលដាលរហូតដល់ទំហំ ៣.២០០ម៉ែត្រការ៉េ នៅវេលាម៉ោង ៥:៣០ ម៉ោងក្នុងស្រុក (ត្រូវម៉ោង ២ ម៉ោងសកល)។ ប្រភពបានប្រាប់សារព័ត៌មាន Reuters ថា ការវាយប្រហារបានធ្លាក់ចំឃ្លាំងស្ដុក Azovskaya និង Azovnefteprodukt ដែលមានសឺទែនប្រេងសរុបចំនួន ២២ធុង។

ទីក្រុងគីវ តែងតែនិយាយថា ការកំណត់គោលដៅថាមពល យោធា និងហេដ្ឋារចនាសម្ព័ន្ធដឹកជញ្ជូនរបស់រុស្ស៊ី ធ្វើឲ្យប៉ះពាល់យ៉ាងធ្ងន់ធ្ងរដល់កិច្ចប្រឹងប្រែងយោធារបស់ក្រុងម៉ូស្គូ។ ទីក្រុង Azov ស្ថិតនៅលើដងទន្លេ Don និងមានចម្ងាយប្រហែល ១៦គីឡូម៉ែត្រ ពីសមុទ្រ Azov៕